Дүниежүзілік банк Қазақстанға 1 млрд доллар берді

SMARTNEWS.KZ басылымының хабарлауынша, Қазақстан мен Дүниежүзілік банк 2026–2031 жылдарға арналған жаңа стратегиялық әріптестік шеңберін қалыптастырады.

Вице-премьер – Ұлттық экономика министрі Серік Жұманғаринның мәлімдеуінше, ұсынылып отырған стратегия реформаларды қолдауға бағытталған, оның ішінде тәжірибелік сараптама, қаржыландыру және бірлескен бастамаларды қамтиды.

Стратегиялық құжатта транспорттық және цифрлық инфрақұрылымды дамыту, климаттық саясат, су және энергетика секторларындағы қызмет сапасын арттыру, қаржы нарықтарын жетілдіру, жеке инвестицияларды ынталандыру және жаңартылатын энергия көздерін кеңейту сияқты басым бағыттар айқындалған.

Дүниежүзілік банк алдағы алты жыл бойына жыл сайын 1 миллиард АҚШ долларына дейін қаржыландыру қамтамасыз етуге дайын. Бұл жеке секторды күшейтуге, инфрақұрылымды дамытуға және экономиканың бәсекеге қабілеттілігін арттыруға мүмкіндік береді. Реформаларды аналитикалық қолдау Қазақстан Үкіметі мен Дүниежүзілік банктің бірлескен экономикалық зерттеу бағдарламасы шеңберінде жалғасады.

2020-2025 жылдардағы алдыңғы стратегия аясында жалпы сомасы 4,2 миллиард доллар болатын 14 жоба іске асырылған. Олардың ішінде «Батыс Еуропа – Батыс Қытай» халықаралық транзиттік дәлізін дамыту, «Алматы – Қорғас» автожолын реконструкциялау, ирригациялық және дренаждық жүйелерді жаңарту бар.

Жобалардың нәтижесінде транспорттық байланыстың жақсаруы 5 миллион адамға оң әсер етті: сапар уақыты үш есе қысқарды, қозғалыс жылдамдығы артты, көлік шығындары 35%-ға төмендеді, 1,2 мыңнан астам тұрақты жұмыс орны құрылды. Мал және шағын бизнеске көрсетілген гранттық және консультациялық қолдау 1 мыңнан астам кәсіпорынға жетті, 175 стартап 41 миллион доллар сату көлеміне және 16 миллион доллар инвестицияға қол жеткізді.

Ирригациялық инфрақұрылымды жаңарту жобасы 92 мың гектар аумақта суды тиімді пайдалануды қамтамасыз етіп, 94 мың су пайдаланушының, оның ішінде 60 мың фермердің жағдайын жақсартты. 763 км канал жаңартылды, бұл егістік өнімділігін арттыруға және жұмыс орындарын құруға мүмкіндік берді. Сонымен қатар аграрлық субсидия жүйесін реформалау аналитикалық қолдаудан өтті.

Мемлекеттік-жеке әріптестік жобаларын қолдау және инвестициялық қызметті кеңейту, соның ішінде кредиттеу мен жеке инвесторлардың қатысуын арттыру жоспарлануда. Алдағы басым бағыттар қатарында теміржол инфрақұрылымын жаңарту, микро- және шағын бизнесті қаржылық институттар арқылы қолдау, агроөнеркәсіптік кешенді дамыту, заманауи ауыл шаруашылығы техникаларын жеткізу және дәнді дақылдарды терең өңдеу жобалары бар.

Кездесу қорытындысында тараптар стратегиялық жобаны ұсыныстарды ескере отырып жетілдіруді және оны Дүниежүзілік банк директорлар кеңесіне ұсынуды келісіп шықты.