Оңтүстік Кореяда қазақтар мен қырғыз азаматтары жаппай төбелескен

SMARTNEWS.KZ басылымының хабарлауынша, Оңтүстік Кореяның Пхёнтхэк қаласында шетел азаматтары қатысқан жаппай төбелеске байланысты полиция тергеу жүргізіп жатыр. Құқық қорғау органдары жанжал Қазақстан мен Қырғызстан азаматтарының екі тобы арасында болуы мүмкін деген нұсқаны тексеруде. Бұл туралы Yonhap агенттігі жазды.

Оқиға 3 қазанға қараған түні Пхёнтхэк портынан алыс емес жерде, тұрғын үйлер орналасқан ауданда болған. Бұл аумақта шетелдік жұмысшылар мен этникалық корейлер тығыз қоныстанған «корейлік қандастар ауылы» қалыптасқан.

Полиция мәліметінше, алғашқы хабарлама кешкі сағат 23:10 шамасында түскен. Жергілікті тұрғын бірнеше көліктің жиналып, адамдардың жаппай төбелесуге дайындалып жатқанын хабарлаған. Полиция патрульдері келген кезде адамдар тарап кеткен.

Арада жарты сағат өткен соң полицияға қайтадан шетелдіктердің жиналып тұрғаны туралы хабар түскен. Қоңырау көп ұзамай үзілген. Жағдайды шұғыл деп бағалаған полиция оқиғаға әрекет етудің ең жоғары деңгейі саналатын «Code Zero» режимін енгізіп, оқиға орнына қосымша күш жіберген.

Алғашқы патруль шамамен 2,5 шақырым жердегі бөлімшеден хабар түскеннен кейін бір минуттан соң жеткен. Кейін оқиға орнына бірнеше патруль көлігі мен Пхёнтхэк полициясының жедел-тергеу қызметкерлері барған.

Полиция төбелестен қашып бара жатқан екі 20 жастағы ер адамды оқиға орнында ұстаған. Олардың бірі — Ресей азаматы, екіншісі — Қырғызстан азаматы. Құқық қорғау органдары олардың Оңтүстік Кореяға, соның ішінде оқу визасы арқылы келгенін және заңсыз мигранттар емес екенін хабарлады.

Ұсталған екі азаматтың да дене жарақаты болған. Полиция олардың жеке басын анықтағаннан кейін медициналық көмек алу үшін ауруханаға жеткізілгенін мәлімдеді.

Ал оқиға орнынан қашып кеткен қалған күдіктілердің азаматтығы, елде болу мәртебесі мен нақты кім екені әзірге анықталған жоқ.

Бастапқыда төбелес кезінде темір шегелер қағылған суық қару қолданылған деген ақпарат тараған. Алайда полиция бұл мәліметті растамады. Тергеу барысында оқиға орнынан маңайдан алынған қарапайым ағаш таяқтар мен бейсбол таяғы табылған.

Куәгерлердің бірі төбелеске 40-тан астам адам қатысқанын айтқан. Алайда полиция жақын маңдағы бейнебақылау камераларының жазбаларын зерттей келе, төбелеске нақты қатысқандардың саны шамамен 15 адамболған деген қорытындыға келген.

Қазір құқық қорғау органдары қашып кеткен күдіктілерді көліктерінің мемлекеттік нөмірлері мен бейнебақылау жазбалары арқылы іздеп жатыр. Алайда тергеуге олардың шетелдік мессенджерлер мен Wi-Fi арқылы байланысқаны кедергі келтіріп отыр. Сондай-ақ күдіктілер қашқан көліктердің жалған немесе басқа адамның атына тіркелген болуы мүмкін деген болжам бар.

Полиция жанжалдың кездейсоқ төбелес пе, әлде алдын ала ұйымдастырылған әрекет пе екенін анықтауға ниетті. Тергеушілер қатысушылардың оқиғаға дейін байланыста болған-болмағанын, көліктерді кім ұйымдастырғанын және олардың бұған дейін бірге әрекет еткен-етпегенін тексеріп жатыр.

Қазіргі таңда полиция оқиғаға қатысы бар адамдарды бірден жаппай ұстаудан гөрі, әр күдіктінің жеке басын анықтап, кезекпен ұстау тактикасын қолданып отыр.

Сонымен қатар тұрғындардың қауіпсіздігін күшейту үшін Пхёнтхэктің Догок-ри ауданында арнайы патрульдеу ұйымдастырылды. Полиция тәуліктің әр уақытында жедел әрекет ету топтары мен арнайы жасақтарды кезекшілікке қойып, аумақта бақылау мен тексеруді күшейтпек.

Полиция өкілі күдіктілердің өзара келісіп алғандай жауап беруден бас тартып, іздерін жасыруға тырысып жатқанын айтты. Құқық қорғау органдары олардың жеке басын анықтап, ұстауға бар күшін жұмсайтынын мәлімдеді.