Қонаевта балалардың жанында әдепсіз әрекет жасаған ер адам жауапқа тартылды (ВИДЕО)
Оқиға туралы видео әлеуметтік желілерде тараған.
SMARTNEWS.KZ басылымының хабарлауынша, Қонаев қаласында балалардың жанында әдепсіз әрекет жасаған ер адам полиция тарапынан жауапкершілікке тартылды. Оқиға туралы видео әлеуметтік желілерде тарады.
Жергілікті тұрғындардың айтуынша, белгісіз ер адам қоғамдық орында кәмелетке толмағандардың жанында күмәнді әрі әдепсіз әрекеттер жасаған. Куәгерлер оның балаларды бақылап тұрғанын айтып, құқық қорғау органдарына шағымданған. Бұл жағдай қала тұрғындарының алаңдаушылығын туғызып, күдіктінің жеке басын анықтауды талап еткен.
Алматы облысы полиция департаменті мәліметінше, ер адамның жеке тұлғасы анықталып, оған қатысты бірнеше әкімшілік құқықбұзушылық бойынша шара қолданылған.
Полицияның хабарлауынша, ол қоғамдық тәртіпті бұзғаны, қоғамдық орында мас күйінде жүргені және дәрігердің тағайындауынсыз есірткі заттарын пайдаланғаны үшін жауапқа тартылған. Іс материалдары сотқа жолданған.
Сонымен қатар құқық бұзушыға заңға қайшы әрекеттердің салдары туралы профилактикалық түсіндіру жұмыстары жүргізілген.
Полиция азаматтарды қоғамдық тәртіпті сақтауға және айналадағы адамдардың қауіпсіздігіне жауапкершілікпен қарауға шақырды.
Материал авторы
