RUS
SMARTNEWS.KZ басылымының хабарлауынша, Ақтөбе облысы Темір ауданына қарасты Кеңқияқ ауылдық округінің әкімі Қуанышбек Серікжанов қайтыс болды. Оқиғаға байланысты полиция сотқа дейінгі тергеп-тексеру жұмыстарын бастады.
Ақтөбе облыстық полиция департаментінің мәліметінше, 1983 жылы туған ер адамның өлімі бойынша қылмыстық іс қозғалған.
«Оқиғаның барлық мән-жайы тергеу барысында анықталады. Тергеу мүддесіне байланысты өзге ақпарат жария етілмейді», – деп хабарлады ведомствоның баспасөз қызметі.
Облыс әкімдігі баспасөз қызметінің дерегіне сәйкес, Қуанышбек Серікжанов 4 мамыр күні қызметінен босату туралы арыз жазған. Ал 5 мамырда оның өтініші қанағаттандырылып, жұмыстан босатылған.
Марқұм 2014 жылдан бері мемлекеттік қызмет саласында еңбек еткен. 2023 жылдың мамыр айында Кеңқияқ ауылдық округі әкімінің орынбасары болып тағайындалса, сол жылдың 15 қазанынан бастап округ әкімі қызметін атқарған.
Айта кетейік, бұған дейін Темір ауданында әкімнің қазасына қатысты жағдай тіркелген болатын. Сонымен қатар Алға ауданы Бестамақ ауылдық округінің әкіміне қатысты да осындай оқиға қоғам назарын аударған еді.