RUS
NASPAA аккредиттелген магистрлік бағдарламалары бар АҚШ-тан тыс әлемдік 13 оқу орнының бірі ретінде Назарбаев университеті танылады.
NASPAA – мемлекеттік басқару саласындағы білім берудің халықаралық қауымдастығы. Сондай-ақ мемлекеттік және муниципалдық басқарудағы магистрлік бағдарламаларды аккредиттеу саласындағы ең көне бірлестіктердің бірі. Бұл мемлекеттік басқару саласындағы жалпы танылған білім стандарты. Енді осы стандартқа Назарбаев Университетінің Жоғары мемлекеттік саясат мектебінің (NU GSPP) Мемлекеттік саясат магистрі (MPP) және Мемлекеттік басқару магистрі (MPA) бағдарламалары ие болып отыр.
Осы арқылы NU GSPP-дің Қазақстан мен аймақтағы мемлекеттік саясат, сондай-ақ басқару саласындағы білім берудегі көшбасшы ретіндегі ұстанымын айқындамақ.
NASPAA аккредитациясы NU GSPP магистранттарына бірқатар артықшылықтар бермек. Мәселен, халықаралық стандарттарға сай сапалы білім алуға кепілдік береді. Одан бөлек, NU GSPP түлектерінің талдау, синтез, сыни ойлау, мәселелерді шешу, дәлелді шешім қабылдау, тиімді коммуникация мен қоғам мүддесі үшін қажетті дағдыларға, зор білімге ие болуын қамтамасыз етеді.
Аккредитация иеленіп отырған NU GSPP бағдарламасы негізгі стратегиялық серіктес саналатын Сингапур Ұлттық университетінің Ли Куан Ю мемлекеттік саясат мектебімен бірлесіп әзірленген. Сингапурға тәжірибелік білім беру сапарын қамтитын оқу бағдарлама магистранттарды табысты мансапқа дайындап, қоғамдағы өзгерістерге тиімді әсер етеді.
«Біз NASPAA және EAPAA-дан толық аккредитациясын алған екі магистрлік бағдарламасы бар әлемдегі жалғыз оқу орны болғанымызды мақтан тұтамыз. Бұл ерекшелік біздің бағдарламаларымыздың жоғары сапасы мен қатаңдығын көрсетеді. NASPAA аккредитациясының арқасында біз Қазақстаннан және басқа елдерден мемлекеттік қызметкерлерің тартамыз деп үміттенеміз», – дейді Мектеп деканы Венг Тат Хуэй мырза.
Еске сала кетсек, 2019 жылы Назарбаев Университетінің Жоғары мемлекеттік саясат мектебінің магистр бағдарламалары EAPAA - Мемлекеттік басқару бағдарламаларын аккредиттеу жөніндегі Еуропалық қауымдастығының толық аккредитациясын алған болатын.