RUS
Ақмола облысында халық арасында сібір жарасына күдікпен 15 жағдай тіркелген: Жарқайың (13 адам) және Есіл (2 адам) аудандарында. Барлық науқастар Ақмола облысы Жарқайың ауданы Үшқарасу ауылында орналасқан «Үшқарасу» ЖШС қызметкерлері.
Адамдардың сырқаттануы ауру жануарларға жанасумен, етін бөлшектеумен, оларды союға қатысумен, жоятын орынға тасымалдаумен байланысты.
2023 жылғы 4 қыркүйектегі жағдай бойынша барлық науқастар «сібір жарасы» диагнозымен Ақмола облысы Есіл ауданы Есіл қаласының ОАА инфекциялық бөлімшесіне жатқызылды. Оның 15-сінде сібір жарасы диагнозы расталған (10 зертханалық расталған, 5 клиникалық).
- Науқастар жағдайының ауырлығы – орташа дәрежелі, тиісті ем қабылдауда. 35 байланысқан адам анықталды, олар медициналық бақылауда. Санитариялық-эпидемиологиялық сараптама нәтижелері бойынша 21 ет сынамасының 16-сында сібір жарасының ДНҚ-сы анықталды. Барлық тексерілген ошақтарда қорытынды дезинфекция жүргізілді, - дейді Санитариялық-эпидемиологиялық бақылау комитетінің өкілдері.
Облыс әкімі орынбасарының басшылығымен штаб құрылған. Штабтың шешімімен 31 тамыздан бастап Үшқарасу ауылының аумағында карантин жарияланған.