RUS
І топтағы мүгедектігі бар Тайбек Өтегенов соңғы жылдары еңбекқорлығымен көпті таңғалдырып жүр. 40-тан асқан азамат әскерден оралған соң жоғары вольтты электр тогына түсіп, екі қолынан айырылған. Алғашында төрт қабырғаға қамалып, қамықты, қайғырды. Бұл қиындық 10 жылға созылды. Кейін бір-ақ сәтте бастан кешкен оқиға оның жігерін жанып, өмірге қайта құлшыныс сыйлады. Сөйтіп, он екі мүшесі сау адамдармен тең отырып, ісін бастады. Оның қазіргі тірлігі көпке үлгі. Ақыл-кеңес сұрап келетіндер көп.
«2018 жылы 500 мың теңге қайтарымсыз грант алдым. Бизнесті дамыту бағдарламасына қатысып, тағы да қайтарымсыз 2 млн теңге қаржы иелендім. Содан бері құс шаруашылығымен айналысып келемін. Алдымен 40-50 балапан шығаратын аппарат сатып алдым. Ал қазір 21 күнде мың дана балапан шығаруға мүмкіндік беретін аппарат бар. Негізі біз осы күнге дайындықты биыл қаңтарда бастадық. Өңірде «Ауыл аманаты» жобасы басталғанын білеміз. Ал ондағы ең тиімді бағыт – құс шаруашылығы. Сондықтан айлар бойы балапан жинап, көктем-жазда саттық. Табысымыз 30 млн теңгеден асты», - деді Тайбек Өтегенов.
Оның айтуынша, инкурабор аппараты қазір өте табысты бизнеске айналған. Егер мың дана балапан болса, оның тең жартысын сатады. Қалғанын өсіріп, тауық сұрағандарға саудалайды. Сонымен бірге балапан бағуға арналған жәшік те жасап шығара алады.
«Елге адал қызмет ету – арманым. Жалпы жұмыс істеймін деген адам екі қолы болмаса да, іске кіріседі. Қазір өзім шолақ қолыммен кесе ұстап, шай ішемін, көлік те жүргіземін. Құдықтан шелекпен бір тонна су тарта берем. Қазір сайрап тұрмын-ау. Бұл ептілігім үшін біраз тер төктім. Қолымның кесілгеніне 20 жыл болды. Мен 20 жасымда қос қолымнан айырылдым. Ауылда жүрген кезде өрістен қой келді. Ағам ауырып жатып, жағдайы болмады. Жанымнан өтіп бара жатқан жігіттен малға су құйып жіберуін өтіндім. Бірақ ол «мен үшін мал жинайсың ба?» деп қайырылмай кетті. Осы жігіттің сөзі жаныма батты. Қолымнан іс келетінін дәлелдемек болып, сол жерде шелекті құдыққа салдым. Бір кесе ұстау үшін бір жыл, су құю үшін 2 жылын сарп еткен адаммын», - деді Тайбек Өтегенов.
Оның жанында отбасы бар. Ауылдағы шаруашылықта аға-жеңгесі отырса, өзі қалада балапан шығарады. Инкубатор аппаратынан шыққан балапанды ауылға жіберіп, қажеттісін қалаға алдырып, қайта сатады. Үйленген. Екі баланың әкесі.
«Кезінде 12 мүшесі сау адамдарды басып озсам деп едім, оздым. Адам еңбек етуі керек», - деді ол.
