RUS
Сыбайлас жемқорлыққа қарсы іс-қимыл агенттігі ШҚО бойынша департаментінің мәліметіне сүйенсек, өңір бойынша соңғы үш жылда алаяқтық фактісі бойынша 71 қылмыстық іс қаралған.
Оның ішінде 39-ы пара беруге итермелеу болып отыр. Барлығы 21 адам сотталды.
Жәбірленушілерге келген материалдық залалдың жалпы сомасы - 477,6 млн теңге.
Мәселен, Шығыс Қазақстан облысында ер адам кәсіпкерді әңгімеге тартып, құқық қорғау органдарымен туындаған мәселені шешіп бере алатынын жеткізген.
Бірақ бұл «көмегі» үшін 43 млн теңге сұрады. Алайда ақшаны алғаннан кейін алаяқ хабар-ошарсыз кетті.
Осылайша, өз мәселесін шешу үшін пара бермек болған кәсіпкер алданып қалып, шығынға батқан.
«Сыбайлас жемқорлық тәуекелдерін жою үшін бүгінде халық пен бизнеске көрсетілетін мемлекеттік қызметтердің 94 пайызы цифрландырылған. Телефон арқылы 940 қызметті алуға болады, 19 құжат түрі цифрлық форматта ұсынылған, 25 қызмет онлайн режимде қолжетімді. Сондықтан азаматтарға лауазымды тұлғаларға ақша беруге қатысты ұсыныстарға мүлде келіспеуге, сондай заңсыздықтарды байқаған жағдайда дереу 1424 телефонына хабарласуды сұраймыз», - дейді департамент басшысы Денис Шакенов.