RUS
Қолданыстағы тәртіпке сәйкес мемлекет кірісіне айналдырылған мүлік бірінші кезекте мемлекеттік заңды тұлғаларға, олардың теңгеріміне бекіту үшін ұсынылады.
Мемлекеттік органдардың мүліктің қажеттілігі туралы өтінішін комитеттің аумақтық бөлімшелері зерделеп, сол мүлікке қажеттілік және өндірістік қажеттілік болған кезде мүлікті береді, сөйтіп мемлекеттік заңды тұлғалардың теңгеріміне бекітеді.
Бұл норма мемлекеттік заңды тұлғалардың материалдық-техникалық базасын, оның ішінде автомашина паркін (қызметтік, кезекші, арнайы) жаңарту үшін бюджет қаражатын үнемдеу мақсатында көзделген.
Мемлекеттік заңды тұлғалар өтініш бермесе немесе мүлікті мемлекет меншігіне беру экономикалық орынсыз болса ол сауда-саттыққа шығарылады.
Сонымен қатар, қазіргі уақытта бұқаралық ақпарат құралдарында және әлеуметтік желілерде тәркіленген мүлікті (мысалы қымбат көліктер, қолсағат, т.б.) мемлекеттік заңды тұлғалардың теңгеріміне беру мәселесі жиі көтеріліп жүр.
Осыған байланысты Қаржы министрлігі нормативтік-құқықтық актілерге тиісті түзетулер енгізуді көздейтін бұйрықтың жобасын әзірледі (Қазақстан Республикасы Қаржы министрінің 2015 жылғы 30 наурыздағы № 227 бұйрығымен бекітілген мүлікті тәркілеу бөлігінде қылмыстық іс бойынша сот үкімі негізінде не мүлікті мемлекетке беру туралы шешім негізінде тыйым салынған мүлікті өткізу немесе пайдалану қағидалары).
Қазіргі уақытта НҚА жобасы мүдделі мемлекеттік органдармен келісіліп жатыр.
Жақын арада аталған бұйрық қабылданғаннан кейін мемлекеттік заңды тұлғалардың теңгеріміне ұсынуға жатпайтын тәркіленген мүліктің тізілімі болады.
Бұл тізілімге енген тәркіленген мүлік бағалаудан кейін сатуға қойылады.
«Сонымен қатар интернет жүйесінде E-Qazyna.kz порталындағы электронды сауда алаңында жүргізілетін тәркіленген мүлікті аукционда сатуға белсенді қатысуға шақырамыз», - дейді комитеттен.