RUS
Гаухар Аман жетекшісімен бірге зерттеу жүргізіп, қарағай инелеріндегі аскорбин қышқылын анықтап, оны адам ағзасына жетпейтін С витаминін толықтыру үшін пайдалануды ұсынып отыр.
«Біз зерттеуді күз және қыс мезгілінде қарағай инелеріндегі аскорбин қышқылының құрамын анықтаудан бастадық. Щучье-Бурабай курорттық аймағындағы қарағай инелеріндегі С витаминінің маусымдық өзгергерістерін талдадық. Алынған дәруменді оқушылардың денсаулығын нығайту үшін пайдалануға ұсынымдар бердік», - дейді жоба жетекшісі, география пәнінің мұғалімі Әйгерім Есмақова.
Гаухар Аманның айтуынша, дәрумен құрамы жыл мезгіліне сай өзгеруі мүмкін, сондай-ақ, аскорбин қышқылының мөлшері де түрлі температурада өзгеріске ұшырайды.
«Зерттеу нысаны – Щучье-Бурабай өлкесінің таза аудандарында өсетін қарапайым қарағай инелері. Салыстырмалы түрде олардың құрамындағы аскорбин қышқылын зерттедік. Гипотезаны дәлелдеу үшін күз бен қыс мезгілінде қарағай инелеріндегі аскорбин қышқылын жылы және салқын кезде йодометрия әдісімен анықтадық», - дейді оқушы.
Зерттеу нәтижесінде қарағай инелеріндегі С дәрумені ауа температурасының төмендеуі мен маусымдық өзгергерістерге байланысты екені дәлелденді. Қылқанжапырақты өсімдік С дәруменнің баламалы көзі, одан тосап не қайнатпа әзірлеп, тұмау мен жұқпалы аурулардың алдын алуға болады.