RUS
Отбасылық жанжал кезінде араша түскен полицейлердің өзіне күш көрсететіндер көп. Отбасылық зорлық-зомбылық мәселесін шешу үшін Мемлекет басшысы жазаны қатаңдатуды тапсырған еді.
– Қазір мұндай құқық бұзушылықтар жәбірленушінің арыз-шағымынсыз тіркеледі. Енді агрессор арыз түссе де, түспесе де, жауапқа тартылады. Кейде жәбірленушіні “үй агрессорынан” құтқарамын деп, қызметкерлер өз өмірі мен денсаулығына қауіп төндіреді, – дейді ІІМ әкімшілік полиция комитеті басқарма бастығының орынбасары Азамат Құрымбаев.
Ведомство мұндай жағдайлардың бірі ретінде БҚО мас ер адам үйінде жанжал шығарып, әйелі полиция шақырғанын жаза кетті. Тәртіп сақшылары оқиға орнына жеткенде “агрессор” өз үйінің ауласында оларға қарсылық көрсетіп, заңды талаптарға бағынбаған. Тіпті, қызметкерлердің бірін пышақпен жараламақ болған.
Жалпы алғанда, жыл басынан бері билік өкіліне қарсы күш қолданудың 146 фактісі тіркеліп, 109 адам түрлі жауапкершілікке тартылған. Оның ішінде 19-ы бас бостандығынан айырылған.
Сондай-ақ сот шешімімен құқық қорғау органы қызметкерінің заңды талабына бағынбағаны үшін 1699 адам әкімшілік жауапкершілікке тартылып, оның ішінде 792 құқық бұзушы қамауға алынған.
– Ішкі істер органдары қызметкерлері қоғамдық тәртіпті қамтамасыз ету мақсатында, яғни сіздің қауіпсіздігіңізді қамтамасыз ету үшін өз өмірлерін қауіпке тігіп, аянбай қызмет етеді. Осыған байланысты полиция қызметкерлерінің заңды талаптарын орындауды, оларға жұмыс барысында кедергі келтірмеуді сұраймыз. Бұндай әрекеттерге жол берген жағдайда қылмыстық және әкімшілік жауапкершілік көзделгенін еске саламыз. Жаза ірі айыппұлдан 7 жыл мерзімге дейін бас бостандығынан айыруды көздейді. Сонымен қатар полиция қызметкерлерінің іс әрекетінде заң бұзушылық орын алған болса, азаматтар шағымдануға құқылы, – дейді Азамат Құрымбаев.