RUS
Аймұрат хостелде 2 айдан астам уақыт тұрады екен. Көз жұмғандардың ішінде оның достары бар. Сөзінше, мұнда тиісті талаптар сақталмаған.
"Барлығы ашық-шашық жатады. Розеткалар ашық. Талаптар сақталмаған. Көз жұмғандардың арасында достарым да бар. Көбі студенттер, жұмыс істейтіндер де бар. Шетелдіктер арасында Алжир, Үндістаннан келген студенттер. Балалар оқу оқитын, даяшы боп жұмыс істейтін. Мен бірінші қабатта тұрдым, оянсам, ештеңе көрінбейді. Ал жертөледе жағдай одан да жаман болды. Сондықтан шыға алмаған сияқты", – деді ол.
Хостел тұрғындарын басқа орынға ауыстырып жатыр. Қолдарына жүктерін көтергендердің басым бөлігі жастар. Арасында ересектер де бар.
"Әйелім қазір мәйіттерді тануға кетті. Электр жүйесімен мәселелер болғаны рас. Мәйіттерді алып шығарғанда да көмектестім. Қазір басқа орынға апара жатыр. Басқа ештеңе айта алмаймын", – деді Владимир есімді хостел тұрғыны.
Tengrinews.kz сайтының мәліметінше, желіде өртке дейінгі қонақүйдің суреттері тарап жатыр.
Суретке қарағанда, бөлмелерде екі қабатты кереуеттер болған.
«13 адам қайтыс болды. Суреттерге қараңыз, адамдар қандай жағдайда өмір сүрген: дәлізде төсек-орындар, төсектер төбеге дейін тиіп тұр. Тіпті терезелер де жоқ», «Әрине, түтіннен жол табу мүмкін емес», «Қайтыс болғандарға обал. Мұндай орындарда жедел түрде тексеру жұмыстары жүргізілуі керек», «Мәселе хостелде ғана емес, студенттердің тұратын жерінің жоқтығында» деп жазады қолданба қолданушылары.
Бұған дейін Алматыда хостелдегі өрттің салдарынан 13 адам мерт болғаны айтылды. Өрттен кейін республикалық комиссия құрылды.Төтенше жағдайлар министрі Сырым Шәріпханов бірінші рейспен Алматыға келеді.