RUS
ҚР Ғылым және жоғары білім министрлігі Дүниежүзілік банктің қолдауымен педагогикалық жоғары оқу орындарының базасында «Педагогикалық білім беру моделін енгізу және оның мазмұнын күшейту» жобасын іске асыруда. Бұл жоба ЖОО-ның жаратылыстану-математикалық бағытындағы 100 оқытушысын CLIL әдістемесіне, 65 педагогы мен мектеп психологтарын ABA ADOS -2 әдістемесіне оқытуды көздейді. Жоба бойынша жалпы 49 педагогикалық оқу орындарда 1800 педагогикалық-оқытушылық құрам оқытылатын болады.
Осы жылы аталған бағдарламаларды масштабтау кезеңі басталады сонымен қатар 2024 жылдың 5-12 қаңтары аралығында оқытудың бірінші кезеңі өткізілген болатын. Бірінші кезеңде барлығы 50 жаттықтырушы оқытылды. Олардың ішінде Марғұлан Университетінің оқытушылары - Татьяна Гаврилова, Роза Мұқанова, Марина Семенова, Ырысгүл Шақаман секілді ғалымдар бар.
Оқытудың екінші кезеңі Марғұлан Университетінде 2024 жылдың 22 қаңтарында басталып, 26 қаңтарға дейін жалғасады. Курстың ашылуына университеттің Ғылыми жұмыстар жөніндегі проректоры Бауыржан Есенгелдин қатысып, спикерлер мен қатысушыларға сәттілік тіледі. Атап өту керек, Марғұлан университеті Солтүстік-Шығыс өңірі үшін базалық жоғары оқу орыны болып табылады. Онлайн форматтағы жиынға Өскемен қаласы университеттерінің 99 және Семей қаласы оқу орындарынан 118 адам қосылады. Барлығы 345 педагог білім алады. Оқыту бағдарламасы 72 сағатқа есептелген. Сабақтар жаратылыстану және математика, гуманитарлық ғылымдар, арнайы білім бағыттары бойынша жүргізіледі.
Біліктілікті арттыру бағдарламасын сәтті аяқтағаннан кейін оқытушылар Хаме қолданбалы ғылымдар университетінен (Финляндия) сертификат алады. Осы жоба шеңберінде педагогикалық жоғары оқу орындарды, оның ішінде Марғұлан Университетін қазіргі заманғы физика, химия, биология кабинеттерімен, инклюзивті білім беру кабинетімен жабдықтау көзделген.