RUS
SMARTNEWS.KZ басылымының хабарлауынша, Қазақстанның мемлекеттік кеңесшісі Ерлан Қарин "Жібек жолы" телеарнасына сұхбат беріп, елімізде қабылданған тоғыз заңның біріне тоқталды.
Ерлан Қарин журналистің «Жер, көше атауларын беруге қатысты барлық шешімнің орталыққа шоғырландырылуы, аймақтық ономастикалық комиссиялардың дербестігін шектеу жергілікті халықтың пікір жеткізу қабылетіне кері әсер етпей ме?» деген сұрағына жауап берді.
Жоқ. Өңірлерде елдімекендердің атауына, көшелердің атауына қатысты сұрақтарды енді тек Ақордада немесе министрлік шешеді деген сөз емес. Ұсыныстарды дайындайтын өңірлердің өздері. Бірақ оларды сараптап, олар бойынша ұсыныстарды бекітетін орталық болады. Бұрын ұсыныстарды өздері дайындап, өңірдің деңгейінде өздері қабылдай салатын... Бұл белгілі бір тепе-теңдікті, балансты, ортақ мемлекеттік ұстанымды қамтамасыз ету үшін жасалып отыр, - дейді Ерлан Қарин.
Осы орайда мемлекеттік кеңесші соңғы жылдары кей өңірде «тым белсенді азаматтар әкімдерге қысым көрсеткен» жағдайлар болғанын айтып қалды.
Бізде соңғы жылдары дисбаланс пайда болды... Ономастика, ескерткіш тұрғысынан. Кей өңірлерде тым белсенді азаматтар әкімдерге ықпал етіп, тіпті, ашығын айтайық, қысым көрсетіп, шулатып, жазып, шағымданып, оларды белгілі бір елдімекен, көше атауын өзгертуге мәжбүрлейді. Көп жағдайда бұл ортақ ел мүддесі үшін болып жатса бір сәрі. Көбіне-көп жеке бастың мүддесі тұрғысынан: туысқандық, ата-бабасының құрметіне...
Олар өздеріне бұрып, бір шешім қабылдағаннан кейін екінші бір ардақты азаматтардан ұрпақтар «біздің атамыз ескерусіз қалды, оның да құрметіне көше берейік» деп шығады. Біз олардың бәріне қайдан көше табамыз. Сөйтіп, тіпті атауы бар көшенің де атауын ауыстырып жатады. Кейбір кісілердің артында ешкім болмағаннан кейін, қысым жасалып, сондай бір шешімге келеді, - деп ағынан жарылды Қарин.
Ерлан Қарин бұл мәселеге қатысты қылмыстық әлемдегі адамдар да араласатынын ашып айтты.
Тіпті қылмыстық әлемге қатысы бар тұлғалардың аттарына тұтас көше, саябақтардың атын беруге тырысқан. Бұл дұрыс па? Бұған шектеу қою үшін біз әрине бұл жұмысты орталықтандыруға мәжбүр болдық, - дейді Қарин.