RUS
SMARTNEWS.KZ басылымының хабарлауынша, Оңтүстік Кореяның барлау қызметі Ресейдегі жұмыс күші тапшылығына байланысты Пхеньян Ресейге 15 мыңға жуық еңбек мигрантын жіберген. Бұл туралы The Wall Street Journal басылымы жазды.
Көптеген солтүстіккореялықтар Ресейге студенттік визамен кірген. Бұл туралы Сеулдегі барлау агенттігі 30 сәуір күні Оңтүстік Корея парламентіне мәлімдеген.
Қазір солтүстіккореялық жұмысшылар негізінен Ресейдің Қиыр Шығысында еңбек етіп жатыр. Алайда ресейлік бизнес өкілдері мен шенеуніктер оларды Мәскеу сияқты ірі қалаларға да тартуға мүдделі. WSJ-дің мәліметінше, жергілікті жұмыс берушілер оларды төмен жалақыға күніне 12 сағат үнсіз жұмыс істеуге дайын болғаны үшін бағалайды.
Солтүстік Корея азаматтарын шетелде жұмыс істеуге тартуға БҰҰ Қауіпсіздік кеңесі тыйым салған. Алайда Ресей мен Қытай бұл шектеуді бірнеше рет бұзған, деп атап өтті америкалық басылым.
WSJ бұл еңбек мигранттарын жіберуді Ким Чен Ынның Ресей президенті Владимир Путинге кезекті "сыйлығы" деп сипаттайды. Бұған дейін Солтүстік Корея Ресейге қару-жарақ жеткізіп, Украинадағы соғысқа әскери көмек көрсеткен болатын.
Басылым Ресейдегі еңбек тапшылығының себебін түсіндіріп, оны туудың төмендеуі мен соғыстағы үлкен адам шығынымен, сондай-ақ елден азаматтардың жаппай кетуімен байланыстырады.
Сонымен қатар, ресейлік "Важные истории" порталы 2024 жылы Ресейге оқу мақсатымен 7,8 мың солтүстіккореялық келгенін жазды. Бұл — 2019 жылдан бергі рекордтық көрсеткіш. Ал "Медиазона" мәліметіне сәйкес, КХДР-дан келген студенттер саны 2024 жылдың үшінші тоқсанынан бастап айтарлықтай өскен.