RUS
SMARTNEWS.KZ басылымының хабарлауынша, Алматыда әйелін пышақтап өлтірді деп күдікке ілінген полицейдің оқиғасына қатысты жаңа деректер айтылды. КТК телеарнасының хабарлауынша, қанды қылмыс балаларының көзінше болған. Олар көршілерін көмекке шақырған.
Қанжоса болған келіншек жедел жәрдем жеткенше жан тапсырған. Кейін күдікті өзінің тамағын пышақпен орып жіберіпті. Қазір оның беті бері қарап, жансақтау бөлімінен палатаға ауыстырылды.
Оқиға сенбі күні болған. 39 жастағы ер адам өз пәтерінде әйеліне бірнеше рет пышақ сұққан деген күдікке ілінді. Алған жарақаттарынан келіншек тіл тартпай кетіпті. Сорақысы, мұның бәрі кішкентай ұл-қыздардың көз алдында болған, деп хабарлайды телеарна тілшілері.
"Шулап жатты, үй жақта жүрген кезімізде, содан көмек сұрады кішкентай қыздары мен үлкен балалары. Сонымен үйден шығып бардым. Жаңағы жағдай болып жатыр. Пышақтаған. 103 пен 102 шақырылды. Келді. 4-5 минуттың ішінде келіп, ары қарай көмек көрсету басталды", - дейді көршілерінің бірі.
Қазір күдікті күзеттің бақылауымен ауруханада жатыр. Жағдайы орташа ауыр дейді дәрігерлер. Ал кикілжіңге отбасындағы жанжал себеп болған. Көрші-қолаң олардың жиі ұрысатынын, ал күдіктінің ішімдікке әуес болғанын айтып отыр.
"Бұл ер адам жиі ішімдік ішкен екен. Полиция қызметкері болған. Пәтерде үнемі төбелес болатын. Ерлі-зайыпты үнемі жанжалдасып жататын", - деді көршісі.
Ресми мәліметке сүйенсек, 39 жастағы күдікті сол күні сап-сау болған әрі ол шынымен де полиция қызметкері болып шықты.
"Адам өлтіру дерегі бойынша Наурызбай ауданы ПБ қылмыстық іс тіркеліп, тергелуде. Бұрын-соңды бұл азамат Алматы облысы ПД қарасты бөлімшелердің бірінде қызмет істеген", - деп пікір білдірді Алматы ПД ресми өкілі Салтанат Әзірбек.
Қаза тапқан 34 жастағы әйел Ұзынағаш ауылындағы балабақшада директоры қызметін атқарған.