RUS
SMARTNEWS.KZ басылымының хабарлауынша, Батыс Қазақстан облысы Теректі ауданы Новопавловка ауылында әкімдік мектептің мұғалімдер бөлмесін шаштаразға жалға беріп, дәретханаларды жауып тастаған. Бұл жағдай ата-аналар мен мектеп ұжымының наразылығын туғызды.
Тұрғындардың айтуынша, бұрын мұғалімдер бөлмесі болған кабинет қазір шаштаразға айналған. Ал мектептегі орын тапшылығы салдарынан дайындық топтары бұрынғы дәретхана болған жерде оқып жүр. Онда әлі де «дәретхана» деген жазу тұр, ал иіс пен жағдай – өте нашар. Тағы бір бөлмені әкімдік өзі әжетхана ретінде пайдаланып жүргені айтылды.
"Балалардың қауіпсіздігіне кім жауап береді? Шаштараздың есігі ашық тұрады, балалар қайшымен ойнап, жарақат алып қалуы мүмкін. Бұл – мектеп, бизнес орталық емес қой", – дейді ауыл тұрғыны.
Мектеп директоры мен ата-аналар әкімдікке бірнеше рет шағым түсіргенімен, нәтиже болмаған.
Осы жағдайға байланысты БҚО білім басқармасы Stan.kz-ке берген жауабында:
"Облыстық білім басқармасының басшысы биылғы жылғы 4 сәуір күні аталған Новопавлов орта мектебіне барды. Жағдайды көзбен көріп, мәселені жергілікті жерде қарастырды. Қазір білім беру ұйымының балансына қайтару жұмыстары жүргізіліп жатыр. Оқушылар сыныптарға орналастырылып, оқу үдерісі қалыпты түрде жалғасып жатыр", – деп жауап берді білім басқармасы.