RUS
SMARTNEWS.KZ басылымының хабарлауынша, Қазақстанның ауыр атлетика федерациясын күйреткен бас бапкер Алексей Ниге жаза тағайындалды.
Халықаралық олимпиада комитетінің бастамасымен 2017 жылы құрылған Допингке қарсы тестілеудің халықаралық тәуелсіз агенттігі (ITA) Ниге қатысты шешім шығарды. Шешім бойынша Алексей Ни енді өмірінің соңына дейін спорттан шеттетіледі. Ал құрамада аға бапкер болған оның бауыры Виктор Ни тек төрт жылға спорттан қуылды.
Айта кету керек, статистика бойынша 2022 жылдан бері 43 спортшы допинг қолданды деп айыпталған. Ал 2023 жылдың дерегі бойынша, отандық 20 ауыр атлет допингке байланысты жазаларын өтеп жатқан көрінеді.
Қазақстан бұған дейін Олимпиада ойындарында ауыр атлетикадан 7 алтын алып, оның 6-ауын допинг расталған соң қайтарып берген. Олар:
– Илья Ильин (Бейжің-2008, Лондон-2012)
– Майя Манеза, Зүлфия Чиншанло, Светлана Подобедова (Лондон-2012)
– Нижат Рахимов (Рио-2016).
Қазір ауыр атлетикадан Қазақстанда бір ғана Олимпиада чемпионы бар, ол - Алла Важенина. Ол 2008 жылы Бейжіңде өткен жазғы Олимпиада ойындарында екінші орын алған еді. Дегенмен 2016 жылы қытайлық ауыр атлет Као Лейдің допинг қабылдағаны расталған соң Алла Важенина бірден Олимпиада чемпионы атанды.
Естеріңізде болса, спорттан қуылған бас бапкер Алексей Нидің допинг дауынан бөлек, ауыр атлеттерге қысым көрсететіні туралы деректермен аты шыққан еді.
2021 жылдың қыркүйегінде Азия чемпионы Альберт Линдер өзіне қол салды. Чемпионның ағасы Семен Линдер бауырының резонанс өлімінің астарында - бапкерлердің қысымы жатыр деді.
Көп өтпей Альберттің командаластары ұлттық құраманың экс-бас бапкері Алексей Нидің «қысым жасайтынын», «табыстарын бөлісуге мәжбүрлейтінін» айтты. Аға бапкер Сергей Седовтің «ұратынын» әшкерелеп, бас бапкер Бақыт Ахметовті де ашық айыптап, мәселе көтерді.
Кейін елдің ауыр атлетика федерациясы атлеттердің мәлімдемесіне байланысты қызметтік тексеріс жүргізіп, Сергей Седов пен Бақыт Ахметовті қызметінен қуды. Бірақ полиция Альберт Линдердің қазасынан соң ашылған қылмыстық істі «қылмыс құрамы жоқ» деп жапты.
Ауыр атлеттерге қатысты дау-дамайдан соң Ни жай ғана отставкаға кетіп құтылған. Сол кезде БАҚ өкілдері Алексей Нидің жазаланбағанына қатысты спорт шенеуніктеріне сауалдарын жолдады. Бірақ сол жылдары Нидің жазасы қараусыз қалған еді...
Айта кетейік, еліміз допинг ережесін көп бұзғандықтан Халықаралық федерация Токио олимпиадасына тек 2 ауыр атлетті апаруға рұқсат берген. Ал биылғы өткен Париж олимпиадасына ауыр атлеттер лицензиясыз қалып, бірде-бірін жарысқа жібермеді.