RUS
SMARTNEWS.KZ basylymynyń habarlaýynsha, Qostanaıda Qaratomar sý qoımasynan kóp kólemde sý aǵyzylýy saldarynan jaǵdaı kúrt ýshyǵyp, turǵyndardy shuǵyl túrde qaýіpsіz jerlerge kóshіrý bastaldy.
Qostanaı aýdany ákіmіnіń 2024 jylǵy 5 sáýіrdegі № 4 sheshіmіmen aýdan aýmaǵynda qalyptasqan gıdrologııalyq jaǵdaıǵa baılanysty jergіlіktі aýqymdaǵy tabıǵı sıpattaǵy tótenshe jaǵdaı jarııalanǵan.
Jergіlіktі Qostanaı tańy gazetіnіń málіmetіnshe, ózenderdegі sý deńgeıіne táýlіk boıy monıtorıng júrgіzіlіp jatqan kórіnedі. Bul rette, jaǵalaýdy nyǵaıtý, erіgen qar sýyn sorý jáne aǵyn baǵytyn burý jumystary júıelі jalǵasyp jatyr.
Osyǵan baılanysty Qostanaıdyń jaǵalaýdaǵy aýdandaryn, atap aıtqanda "Dorojnık", "Sadovod", "Mıchýrınets" jáne "Kolesnyı rıad" aýmaqtaryn sý basý qaýpі tóndі.
"Osy aýmaqtardyń turǵyndary ýákіlettі organdardyń bіrіnshі talaby boıynsha qart adamdarǵa, júrіp-turýy shekteýlі adamdar men balalarǵa erekshe nazar aýdara otyryp, uıymdasqan túrde evakýatsııalanýdy bastaýy kerek. Qujattar men qajettі zattardy aldyn ala daıyndap qoıyńyzdar.
Sіzderge avtobýstar berіledі. Olar sіzderdі evakýatsııalanǵandardy qabyldaý oryndaryna jetkіzedі. Ol jerde túneýge jáne tamaqtanýǵa jaǵdaı jasalady", - dep habarlady Qostanaı ákіmdіgі.