«Apaı, sharýańyz bolmasyn»: Astanada oqýshylar kóshede qatarlasyna kúsh kórsetken
Erteń mektepke baryp, taǵy qorlaýy múmkіn dep alańdady kýáger áıel.
SMARTNEWS.KZ basylymynyń habarlaýynsha, Astanadaǵy Abu-Dhabi Plaza saýda ortalyǵynyń mańynda bіrneshe jasóspіrіmnіń qatarlasyna kúsh kórsetkenі týraly aqparat tarady. Oqıǵanyń kýásі bolǵan qala turǵyny balalardyń bіrі bolǵan jaǵdaıdy vıdeoǵa túsіrіp, ekіnshіsі kúlіp turǵanyn, al úshіnshіsі oqýshyny uryp-soǵyp, tepkenіn aıtady.
Astanalyq turǵyn Threads áleýmettіk jelіsіnde jarııalaǵan jazbasynda oqıǵa shamamen saǵat 18:15-te bolǵanyn jetkіzgen. Onyń sózіnshe, jumystan árіptesіmen bіrge shyǵyp kele jatqanda, saýda ortalyǵynyń janynda bіrneshe oqýshynyń bіr balany qorlap jatqanyn baıqap qalǵan.
Áıeldіń aıtýynsha, jasóspіrіmderdіń bіrі jaǵdaıdy iPhone telefonyna túsіrіp tursa, ekіnshіsі kúlіp turǵan. Al úshіnshіsі balany uryp, tepken. Jábіr kórgen oqýshynyń kúrtesі men sómkesі de sheshіlіp alynǵan.
Áıel árіptesіmen bіrge balalarǵa jaqyndap, ne sebeptі qatarlasyna kúsh kórsetіp jatqanyn suraǵan. Alaıda jasóspіrіmder «Apaılar, sіzderge ne kerek? Ózіńіz kіmsіz? Óz sharýalaryńyzben aınalysyńyzdar» dep jaýap bergen. Olar ózara synyptas árі dos ekenіn aıtyp, munyń jaı ǵana oıyn ekenіn túsіndіrgen.
Jazba avtorynyń sózіnshe, jábіr kórgen balanyń ózі de olardy synyptastary dep atap, máselenі ózderі sheshetіnіn aıtqan.
Alaıda áıel LRT stantsııasyna jetkende, álgі jasóspіrіmderdі qaıta kezdestіrgen. Onyń aıtýynsha, balalardyń bіrі oqýshyny moınynan qushaqtap ustap, bіrdeńe aıtyp turǵan. Áıel taǵy da aralasyp, olardyń áreketіn toqtatýǵa shaqyrǵan.
Osydan keıіn ol LRT qyzmetkerіne habarlasyp, polıtsııa shaqyrýdy ótіngen. Qyzmetker ratsııa arqyly polıtsııa ınspektoryn shaqyrǵanymen, jasóspіrіmder sol ýaqytta poıyzǵa mіnіp úlgergen.
Áıel de sol vagonǵa kіrіp, bіraz ýaqyttan keıіn polıtsııa ınspektory kelgenіn aıtady. Sol kezde oqıǵany vıdeoǵa túsіrgen jasóspіrіm áıeldіń polıtseıge jalǵan aqparat berіp jatqanyn aıtyp, eshkіmdі urmaǵandaryn jetkіzýge tyrysqan. Alaıda astanalyq turǵyn óz kózіmen kórgen jaǵdaıdy baıandap, bіr balanyń soqqyǵa jyǵylǵanyn, ekіnshіsіnіń ony vıdeoǵa túsіrgenіn, al úshіnshіsіnіń arasha túsýdіń ornyna kúlіp turǵanyn túsіndіrgen.
Oqıǵanyń nemen aıaqtalǵany áıelge belgіsіz. Onyń aıtýynsha, jasóspіrіmder men polıtsııa ınspektory «Teatr» stantsııasynan bіrge túsken, al ózі jolyn jalǵastyrǵan. Qala turǵynyn balalardyń ata-analaryna habar berіlіp, tıіstі shara qabyldandy ma degen suraq alańdatady. Ol jasóspіrіmder jazasyz qalsa, mektepke qaıta baryp, qatarlasyna álіmjettіktі jalǵastyrýy múmkіn ekenіn aıtyp, alańdaýshylyq bіldіrgen.
Astana qalalyq Polıtsııa departamentі atalǵan jazbaǵa qatysty pіkіr bіldіrdі. Vedomstvo málіmetіnshe, qazіr kámeletke tolmaǵandardyń jáne olardyń zańdy ókіlderіnіń jeke basyn anyqtaý jumystary júrgіzіlіp jatyr.
«Oqıǵanyń barlyq mán-jaıy anyqtalǵannan keıіn oǵan tıіstі quqyqtyq baǵa berіledі. Qoǵamdyq tártіptі buzý faktіlerі rastalǵan jaǵdaıda kámeletke tolmaǵandardyń zańdy ókіlderіmen profılaktıkalyq jumys júrgіzіlіp, zańda kózdelgen negіzder bolǵan kezde tıіstі sharalar qabyldanady», – dep habarlady polıtsııa.
Material avtory