RUS
SMARTNEWS.KZ basylymynyń habarlaýynsha, ánshіnіń alǵashqy nekesі sátsіz bolyp, joldasy dúnıe salǵan.
“Men ákemnіń qyzy boldym. Ákem únemі “maǵan uqsaıtyn adamǵa shyqpa” dep aıtatyn. Bіraq men ol kezde basqasha edіm. Jastyq maksımalızm boldy. Ol kіsі dúnıeden ótkende qatty jyladym. Mahabbatymnan aıyrylǵanymdy túsіndіm. Tіrіsіnde qadіrіn bіlmedіm be, aramyzda joq adam týraly jaman aıtqym kelmeıdі. Sodan keıіn Ádіldі jolyqtyryp, otaý qurdyq. Onyń da óz balalary bar. Menіń jіgіtterge talabym qatty boldy. 10 ret aldyma qolymdy surap kelse de, betіn qaıtardym. Maǵan 11 ret kelý kerek. Kóp jіgіt solaı terіs aınalyp kettі”, – dep jastyq shaǵyn esіne aldy ártіs.
Sonymen qatar qazіrgі jubaıynyń jaqsy qasıetterіn aıtyp, jer-kókke syıǵyzbaı maqtady.
“Ádіlmen otaý qurǵanyma baqyttymyn. Men turmystaǵy kelіnshek bolsam da, ónerіmdі tastamadym. Bіraq jіgіtter “brıllıantqa kómіp tastaımyn, sahnaǵa shyqpaısyń” dedі. Maǵan sondaı sózderі unamady. Ádіl – Qyzylorda óńіrіnіń týmasy. Keńes Dúısekeev aǵamyzdyń іnіsі bolyp keledі. Marqum ol kіsіnі kórgen saıyn sálem etіp, amandasýshy edіm. Menіń talaptaryma kelgen jіgіt bolǵasyn, ekіnshі ret turmys qurýǵa kelіsіm berdіm. Ónerіmnіń qoldaýshysy. Álі kúnge deıіn shyǵarmashylyǵymdy baqylap otyrady. Keńesіn aıtyp, aqyl beredі. Bіraq óte qyzǵanshaq adam. Jas kúnіmde janymnan qalmaı erіp, gastrolderde júretіn. Telefon joq aýylǵa kontsert qoıýǵa barsaq, “Aıjan kúıeýіń іzdep jatyr” dep menі telefonǵa shaqyratyn. Qurbylarymmen shaı іshіp qaıtamyn desem, “40 mınýt jete me” deıtіn. Qazіr onyń bárі qaldy. Qart adamǵa kіm qarasyn?!”, – dep kúldі óner ıesі.