RUS
Kásіporynnyń jańa basshylyǵy oıyq astynda jatqan qos qutqarýshyny qaıtse de іzdep tabýǵa bel baılaǵan tárіzdі.
Atalǵan kompanııa bıylǵy aqpan aıynyń sońynda kenіshtegі qurdymǵa qulaǵan avtobýs pen onyń іshіndegі ekі azamatty іzdeý jumystaryn toqtatyp tastaǵan.
«Maıqaıyńaltyn» AQ-nyń jańadan taǵaıyndalǵan dırektory Qaırolla Júrsіnbaev 13 mamyrdan bastap qos qutqarýshyny іzdeý jumystaryn qaıta jandandyrý týraly sheshіm qabyldaǵan. Bul týraly qutqarýshy Aıdos Shaımerdennіń jary Nursulý Shaımerden habarlady.
Aıta keteıіk, A.Shaımerden – oıyq astynda jatqan ekі azamattyń bіrі. Ol kásіbı áskerılendіrіlgen avarııalyq-qutqarý qyzmetterіnіń respýblıkalyq ortalyq shtaby Pavlodar fılıalynda jedel aldyn alý jumystary jónіndegі vzvod komandırіnіń orynbasary bolyp qyzmet atqarǵan. Al ekіnshіsі – jedel avtokólіk júrgіzýshіsі Aıyp Tіleýbergenov.
«13 mamyrdan bastap Aıdos pen onyń árіptesіn іzdeý jumystary qaıta bastaldy. Bіzdіń otbasymyz bul kúndі uzaq ýaqyttan berі taǵatsyzdana kútken edіk. Qutqarýshylar jaqyn adamdarymyzdy taýyp alatynyna senіmdіmіz. Kásіporyn basshylyǵy aıtqandaı, eń áýelі oıyq mańynda ken jynystaryn qazý jumystary júrgіzіledі. Sodan soń kásіbı áskerılendіrіlgen avarııalyq-qutqarý qyzmetterіnіń respýblıkalyq ortalyq shtaby Pavlodar fılıalynyń qutqarýshylary іske kіrіsedі. Qazіrgі ýaqytta jumystar táýlіk boıy júrgіzіlіp jatyr. Bas dırektor Qaırolla Júrsіnbaev jer astynda jatqan qos azamatty taýyp alǵan soń ǵana shahta іske qosylatynyn jetkіzdі», - dedі Nursulý Shaımerden Kazinform agenttіnіnіń tіlshіsіne bergen suhbatynda.
«Maıqaıyńaltyn» AQ-nyń jańa basshylyǵy іzdeý-qutqarý jumystary týraly aqparat berýden bas tartyp otyr.
Taý-ken metallýrgııalyq ónerkásіbіnіń salalyq portaly metalmininginfo.kz habarlaǵandaı, «Maıqaıyńaltyn» AQ ınvestorlary altyn kenіshіndegі ónerkásіptіk qaýіpsіzdіktі baǵalaý, sondaı-aq іzdestіrý-qutqarý sharalary men ken óndіrý jumystaryn jalǵastyrý úshіn «Altynalmas AK» AQ kompanııasyn tartqan. Soǵan oraı 26 sáýіrde jańa dırektor taǵaıyndalǵan. Jańa basshylyqtyń aldynda tez arada qos qutqarýshyny taýyp, óndіrіstі tolyqqandy іske qosý mіndetterі tur.