«Ulttyq quramada tek kókpar boıynsha 30-ǵa jýyq at ázіrlenіp jatyr. Onyń іshіnde 24-і erteń keledі. Sol 24 attyń barlyǵynyń da ataqtary bar, búgіngі kúnge deıіn jeńіsterge jetken. Álem chempıonatynda jeńgen Nurǵasqa sáıgúlіgі bar, onymen Qurmanbek Turǵanbek atty úkіlegen úmіtіmіz óner kórsetedі. Odan bólek, Jumyrtuıaq, Sekret atty talaı báıgede top jarǵan attar kelýі yqtımal. Tіptі Dýbaıdaǵy báıgede jeńіske jetken Kabırhandy bіlesіzder, Qabіrhan keledі dep josparlanǵan», - dedі Q.Máýlen «Qazanat» ıppodromynda ótken baspasóz máslıhatynda.
Bіraq spıkerdіń aıtýynsha, álі de aýa raıy men transportqa baılanysty ózgerіster bolýy múmkіn.
«Olar jeke adamdardyń attary bolǵandyqtan memlekettіń, ulttyq quramanyń quzyryndaǵy іs emes. Sondyqtan osyndaı nıýanstar bar. Bіraq elіmіzdіń atynan qatysatyn sáıgúlіkterdіń bárі óte jaqsy tańdalǵan jáne daıyndalǵan», - dedі ol.
Eske sala keteıіk, jyl basynda qazaqstandyq sáıgúlіk Kabırhan Dýbaıda ótken jarysta top jarǵan edі. Talaı sheteldіktі tańdaı qaqtyrǵan tulpar Qazaqstannyń atyn álemge tanytty.
5-shі Dúnıejúzіlіk kóshpendіler oıyndary Astana qalasynda 8-13 qyrkúıek aralyǵynda ótedі. Álemdіk dodaǵa 89 elden 2800-ge jýyq qatysýshy keledі dep josparlanyp otyr. Onda sporttyń 21 túrі boıynsha 97 medal jıyntyǵy sarapqa salynbaq.
