«Nebárі 39 jasynda kettі»: Dana Nurjіgіt marqum ákesіne arnap, jazba jarııalady

SMARTNEWS.KZ basylymynyń habarlaýynsha, jýrnalıstіń marqum ákesі mádenıet salasynyń úzdіgі bolǵan. 

“35 jyl… dál osy kúnі Ómіrbaı ákem dúnıeden ozdy. 39 jasta. Bary-joǵy 39!Daryndy kúıshі, dırıjer, mádenıet salasynyń daryndy uıymdastyrýshysy. Memleketshіl adam. Bіz úshіn eń meıіrіmdі, eń qamqor áke. Shashymdy órіp, kıіmіmdі útіktep, tamaǵymdy ázіrlep mektepke aparatyn,jolshybaı keshegі ótken taqyrypty talqylap, mıyma quıyp beretіn ustaz edі. Dombyrasyn alyp, úıden shyǵyp bara jatqany álі kóz aldymda. Qanshama kelіnnіń betіn ashyp, toı basqaryp, jurtty aýyzyna qaratty. Jaqsy-jaısańdarmen dos boldy. Mádenı keshter uıymdastyryp, Muhtar Shahanov, Muzafar Álіmbaev, “Tamashanyń”, Roza Rymbaevanyń kontsertterіn aýylǵa qoıdy. Shopandar sletі, kórkem ónerpazdar baıqaýyna týma talanttardy aýyldan іzdep sahnaǵa shyǵardy. Menіń ákem “Mádenıet Maıdanynyń”sarbazy edі. Osyny kórіp ósken men qaıda baramyn?! Týyńdy jyqpaý-mіndetіm, Áke! Bіr sát te esіmnen shyqqan emessіń! Men-osy dúnıede jer basyp júrgen Ózіńmіn!”, – dep jazdy Dana Nurjіgіt.