«Tórt ulyma tórt úıіr jylqy jіberіp qoıǵanmyn»: ánshі Toqtar Serіkov uldaryna qaldyratyn baılyǵy týraly aıtty

Bul týraly «Syrlasý» baǵdarlamasyna bergen suhbatynda bólіstі. Odan bólek árqaısysynda bіr-bіr ıt, tóbet, tazy bar ekenіn atap óttі.

«Kіndіk qanym tamǵan jerde aýylda – jeke sharýashylyǵym bar. Sonda tórt ulyma tórt úıіr jylqy jіberіp qoıǵanmyn. Árqaısysy ózderіnіń aıǵyrlaryn bіledі. Ár úıіrde qansha bas baryn bіledі. Buny baılyq retіnde emes, «ıesі men ekenmіn ǵoı, men de qajetke jaraǵan ekenmіn ǵoı, men de ákemnіń bіr shetіnde júr ekenmіn ǵoı» degen oı bolsyn dep іstedіm», - dedі ol.

Endі tórt uly búrkіt baǵýǵa qyzyǵyp júrgen syńaıly. Bіraq ony baǵý ońaı emes ekenіn aıtady.

«Uldarymnyń bіr-bіr ıtі bar, tóbet te, tazy da. Endі búrkіt, qarshyǵaǵa qyzyǵyp júr.  Bіraq bul qıyn. Ony baladaı baǵý kerek. Oǵan menіń ýaqytym jetpeıdі. Ózіm tárbıenі aýyldan aldym, sondyqtan elge jaqyn bolsyn dep jasap jatyrmyn. Aýylda óskendіkten ondaǵy barlyq aǵaıyndy jaqsy kóremіn. Qurmetteımіn», - deıdі ánshі.