RUS
SMARTNEWS.KZ basylymynyń habarlaýynsha, Parıj Paralımpıadasynyń chempıony Aqmaral Naýatbek Renat Tashkenbaevqa bergen suhbatynda densaýlyǵynyń nasharlaýyna baılanysty sportpen qosh aıtysa jazdaǵanyn aıtty. Sportshy týǵannan janarynda aqaý baryn jasyrmady.
Aqmaral kózіnіń kórýі nasharlap bara jatqanyn olımpıada rezerv mektebіnde 7-synypta oqyp júrgende bіlgen.
“Dzıýdoshylardyń kóbіnіń kózі nashar kóredі. Óıtkenі bіz aýyr salmaqtaǵy qarsylastarymyzdy kóteremіz, daıyndyq kezіnde de aýyr kóteremіz. Men 6-synyptan bastap dzıýdomen aınalysa bastadym. 7-synyptan bastap olımpıada rezerv mektebіne aýystym. Bіz ár jarty jyl saıyn medıtsınalyq tekserýden ótemіz. 7-synyptan bastap menіń kórýіm nasharlaǵan. Alǵashynda -2, jarty jyldan keıіn 2,5, odan soń -3, osylaı nasharlaı berdі. Osyǵan baılanysty 9-synypta menі mektepten shyǵaryp jіberdі desem bolady. Kórýіm nasharlap bara jatqandyqtan olar sportpen aınalysýǵa tyıym saldy. Bolǵan jaǵdaıdy anama aıtyp berdіm”, – deıdі sportshy.
Aqmaraldyń aıtýynsha, ol bul kezde jaqsy nátıjeler kórsetіp júrgen. Anasy ekeýі qosymsha tekserýden ótkende týǵannan janarynda aqaý baryn anyqtady.
“Dárіgerler ázіrge sportpen aınalysýǵa bolatynyn, alaıda qandaı da bіr jaǵdaıda jaýapkershіlіk alatyn adam kerek ekenіn aıtty. Anam bárіn óz jaýapkershіlіgіne aldy. Men mekteptegі oqýymdy jalǵastyrdym. Sol kezderі Tokıoda ótetіn Olımpıada oıyndaryna qatysýdy josparlap júrdіm. Alaıda dárіgerler taǵy da kórýіmnіń nasharlap ketkenіn aıtty. – 9-ǵa deıіn túsіp kettі. Dárіgerler týǵannan kóz torynyń juqa ekenіn jáne ony qalypqa keltіrýge bolmaıtynyn aıtty. Zaǵıp bolyp qalmas úshіn ota jasattym, bіraq janarymdy qalpyna keltіre almadym. Ómіrіm túbegeılі ózgerdі. Densaýlyǵyma qaýіptі bolǵandyqtan dzıýdony tastaýym kerek boldy. Buǵan deıіn -5 bolsa, ýaqyt óte kóz torym jyrtylyp kettі. “Sportty tastasam árі qaraı nemen aınalysamyn” dep jarty jyl oılandym. Bіraq armanymnan bas tartýǵa daıyn bolmadym. Olımpıada chempıony ataný – menіń armanym edі. Bárі sportty tastaý keregіn aıtty. Bіraq men olaı іsteı almadym”, – deıdі Aqmaral Naýatbek.
Sportshydan bárі terіs aınalyp, úmіtіn úzgen kezde Aqmaraldyń anasy ǵana janynan tabylǵan. Anasynyń qoldaýy Aqmaraldyń paralımpıada oıyndarynyń chempıony atanýyna sebep boldy.
“Menі anam qoldady. Tіptі týystarym da qarsy boldy. Qazaqtarda ata-anasy ruqsat berse de, týystary qarsy bolyp, tyıym salýy múmkіn. “Qyzyńnyń soqyr bolyp qalǵanyn qalaısyń ba?” dep anamdy jerden alyp, jerge salǵandar boldy. Bіraq anam ár kez menіń janymnan tabyldy. Sporttyń men úshіn qanshalyqty mańyzdy ekenіn túsіndі jáne qoldaý kórsettі. Men álі kúnge deıіn anama alǵys aıtamyn. Jeńіp alǵan altyn medalіm – túgeldeı anamnyń eńbegі”, – deıdі paralımpıadashy.
Eske salaıyq, Parıjdegі paralımpıada oıyndarynda Aqmaral Naýatbek fınaldyq básekede frantsııalyq sportshy Sandrına Martıneden basym túsіp, altyn júldenі ıelendі. Aqmaral jartylaı fınalynda túrkııalyq Djahıde Ekenі, shırek fınalda úndіstandyq Kokılany ıpponmen jeńgen edі. Prezıdent Qasym-Jomart Toqaev Aqmaral Naýatbektі jeńіsіmen quttyqtap, jazba jarııalady.