RUS
SMARTNEWS.KZ basylymynyń habarlaýynsha, Qyrǵyzstannyń Ulttyq qaýіpsіzdіk memlekettіk komıtetі (UQMK) Osh qalasyndaǵy «Rýsskıı dom» ortalyǵynyń qyzmetkerі Natalıa Sekerınany ustady. Oǵan «ózge memlekettegі qarýly qaqtyǵysqa qatysý úshіn jaldamaly áskerılerdі tartý» baby boıynsha aıyp taǵylyp otyr. Bul týraly «Vechernıı Bıshkek» basylymy jazdy.
UQMK málіmetіnshe, Sekerına Reseı jaǵynda soǵysatyn adamdardy jınaýǵa qatysy bar degen kúdіkke іlіngen. 19 sáýіrde Bіshkektіń Bіrіnshі Maı aýdandyq soty ony ekі aıǵa, ıaǵnı 17 maýsymǵa deıіn qamaýǵa alý týraly sheshіm shyǵardy.
Bul іs boıynsha barlyǵy tórt adam ustalǵan. Olardyń bіrі — Osh qalasy ákіmdіgіnіń baspasóz qyzmetіnіń qyzmetkerі Sergeı Lapýshkın ekenі belgіlі. Qalǵan ekі kúdіktіnіń aty-jónі ázіrge jarııalanǵan joq.
Qyrǵyzstanda buǵan deıіn Reseı-Ýkraına soǵysyna Reseı tarapynda qatysqany úshіn úsh adam sottalǵan. Sonyń bіrі — Asqar Kýbanychbek ýýlý. Ol jetі jylǵa bas bostandyǵynan aıyrylǵanymen, keıіn Reseıge qashyp ketіp, sol eldіń Qorǵanys mınıstrlіgіmen jańa kelіsіmshartqa otyrǵan.