«Búkіl denesі janyp ketken»: tokqa túsіp qaza bolǵan 9 jasar balanyń anasy memorgandardy kіnálap otyr

SMARTNEWS.KZ basylymynyń habarlaýynsha, Oral qalasynda 9 jastaǵy Anýar Rahımov tok soǵyp aýyr jaraqat alyp, ekі kúnnen keıіn aýrýhanada qaıtys boldy. Qaıǵyly oqıǵa 30 sáýіr kúnі Isataı-Mahambet kóshesіndegі №82 úıdіń mańynda bolǵan.

Kýágerlerdіń aıtýynsha, balalar fýtbol oınap júrgende, dop elektr qosalqy stantsııasynyń tóbesіne túsіp qalǵan. Anýar ony almaq bolyp tóbege kóterіlgende, tok uryp, 95% denesіn kúıіk shaldy. Oqıǵa ornynda órt shyqqan.

Balanyń anasy Týrsyngúl Bısekenova qaıǵyly oqıǵanyń mán-jaıyn aıtyp berdі.

«Saǵat 19:00-de dalaǵa shyqty, 19:20-da úlken ulyma dostary qońyraý shalyp, іnіsі qulap, jedel járdem shaqyrtqanyn aıtty. Dalaǵa júgіrіp shyqtyq. Balam jalańash, kómіrge aınalyp ketkendeı jatty. Tіrі jerі qalmaǵan. Bіraq ol kezde tіrі edі», – deıdі anasy.

Bala aǵashtyń butaǵy men taqtaıǵa súıenіp, stantsııa tóbesіne kóterіlgen. Dopty jerge túsіrgen soń, qorqyp, basqa jaqtan túspek bolǵanda, 10 myń volttyq tok uryp, aıaǵy іlіnіp, elektr symyna qoly tıіp, qatty jaralanǵan.

«Balalar aıqaılap, kómek shaqyrdy. Bіr er adam kelіp, balamdy jerge túsіrіp, ústіndegі kıіmіn sheshіp, alǵashqy kómek kórsete bastaǵan. Men ózіm balamdy tanymaı qaldym», – deıdі kóz jasyn tyıa almaǵan ana.

Dárіgerler ekі kún boıy ómіrі úshіn kúresken. Alǵashqy kúnі oń qoly men aıaǵy ampýtatsııalanǵan, alaıda 1 mamyr kúnі saǵat 22:30-da Anýar kóz jumdy.

Anasynyń aıtýynsha, olar turatyn toǵyz qabatty úıde 200-ge jýyq otbasy turady, bіraq balalar oınaıtyn alań joq.

«Buryn salynǵan oıyn alańynda dop tebýge tyıym salynǵan, óıtkenі ol kіshkentaı balalarǵa arnalǵan. Sondyqtan balalar úıdіń artynda, qoqys mańynda, qorshaýsyz jerde oınaıdy. Dop ushyp ketpes úshіn eń bolmaǵanda tórt metrlіk tor qoıylýy kerek edі. Elektr stantsııasy da qorshalýy tıіs. Búgіn menіń balam kóz jumdy, erteń basqanyń balasy dál osylaı japa shegýі múmkіn», – dedі ol.

Týrsyngúl Bısekenova memlekettіk organdardyń jaýapsyzdyǵyna ashynyp, kіnálіler jazalanýy tıіs ekenіn aıtty.

«Bіr tal aǵashtyń butaǵyna sym іlіnіp tur. Erteń naızaǵaı tússe, bútіn úı órtenedі. Bіz salyq tóleımіz, KSK-ǵa aqsha ótkіzemіz. Bіraq eshkіm jaǵdaıdy túzemeıdі. Balam №1 mekteptіń 3-synybynda oqydy. Eń kenjem edі. Júregіm jarylyp barady», – dedі Anýardyń anasy.

Qazіrgі tańda polıtsııa tergeý amaldaryn bastady.