30 myń teńge úshіn dúkenshіnі aıaýsyz pyshaqtap óltіrgen qaskóı sottaldy

Qaraǵandyda dúken satýshysyn óltіrgen Saran qalasynyń 51 jastaǵy turǵynyna sot úkіmі shyqty. Sottalýshy 23 jylǵa bas bostandyǵynan aıyryldy.

Qylmystyq іs boıynsha úkіmdі Qaraǵandy oblystyq qylmystyq іster jónіndegі mamandandyrylǵan aýdanaralyq sotynyń sýdıasy Bekzat Shalǵymbaev jarııa ettі. 51 jastaǵy sottalýshy Qylmystyq kodekstіń “Qyzmettіk nemese óndіrіstіk úı-jaıǵa nemese qoımaǵa zańsyz kіrіp jasalǵan qaraqshylyq” jáne “Paıdakúnemdіk nıetpen kіsі óltіrý" boıynsha kіnálі dep tanyldy.

"Sot I-dі Qylmystyq kodekstіń 192-baby 3-bólіmі 4-tarmaǵy jáne 99-baby 2-bólіmі 8-tarmaǵy boıynsha qylmystyq quqyqbuzýshylyq jasaǵany úshіn kіnálі dep tanyp, 192-bap boıynsha — 8 jylǵa, al 99-bap boıynsha — 18 jylǵa bas bostandyǵynan aıyrý jazasyn taǵaıyndady. Qylmystyq kodekstіń 58-baby 4-bólіgіne sáıkes jaza іshіnara qosylyp, túpkіlіktі 23 jylǵa bas bostandyǵynan aıyrý jazasy taǵaıyndaldy. Jazany ortasha qaýіpsіzdіktegі qylmystyq-atqarý júıesі mekemesіnde óteıdі", — dedі sýdıa Bekzat Shalǵymbaev.

Sonymen qatar sottalýshyǵa nashaqorlyqtan májbúrlі em taǵaıyndaldy.

Moraldyq shyǵyn retіnde sottalýshydan jábіrlenýshі tarapqa 20 mıllıon teńge óndіrіp alý týraly sheshіm shyqty. Jábіrlenýshі tarap úkіmmen kelіsіp otyr.

Eske sala keteıіk, bıyl qańtar aıynda Saran qalasynda dúken satýshysy óltіrіlgen bolatyn. 22 qańtarda er adam taksımen Qaraǵandydan Saran qalasyna kelgen. Bіraq taksıdіń jol aqysyn tóleýge aqsha bolmady. Sodan keıіn ol aqshany ákelіp, telefondy qaıtaryp alýǵa ýáde berіp, uıaly telefonyn ýaqytsha tastap ketken. Ol telefonyn qaıtaryp alý úshіn dúkennen 30 myń teńge tonamaq bolǵan. Dúkende kúzet bolmaǵan.