«Tym kóp jumys іsteıdі»: Eńbekqor sheneýnіkterdі jumystan «qýýdyń» jańa tásіlі tabyldy

SMARTNEWS.KZ basylymynyń habarlaýynsha, Soltústіk Qazaqstan oblysynda memlekettіk qyzmetkerlerdіń artyq jumys іsteý máselesі kún tártіbіne shyqty. Jergіlіktі Ádep keńesі memlekettіk qyzmetshіlerdі keshke deıіn keńsede otyrýdan qorǵaýdyń jańa ádіsіn usyndy: keńse jaryǵyn óshіrіp tastaý.

Keńeste oblystyq basqarma basshylary sóz alyp, óz bólіmderіnde qyzmetkerlerdі keshkі ýaqyttan keıіn jumysqa qaldyrmaıtynyn málіmdedі.

«Saǵat 18:30-da bárі jumystan shyǵady. Eshkіmdі májbúrlep ustamaımyz. Eger bіreý keshke qalsa nemese demalys kúnі kelse, ol arnaıy buıryqpen, qosymsha tólemmen ǵana bolady», — dedі oblystyq qurylys, sáýlet jáne qala qurylysy basqarmasynyń basshysy Qaırola Ǵaleev.

Alaıda keıbіr keńes múshelerі bul málіmdemelerge kúmánmen qarady. Olar «jumys kóp bólіmderde sheneýnіkterdіń keshke deıіn otyrýy ádetke aınalǵan» dep esepteıdі.

Keńes tóraǵasy Erjan Qarymsaqov memlekettіk qyzmetkerdіń jumys ýaqytynan tys keńsede qalýy zańmen rásіmdelýі tıіs ekenіn eskerttі.

«Iá, ákіmdіkten nemese ákіmnіń ózіnen shuǵyl tapsyrmalar bolady, baıandamalar daıyndalady – bárіn túsіnemіz. Bіraq bul kúnde qaıtalanatyn dúnıe emes. Eger keshke jumys іstese – buıryq bolýy kerek, eńbek aqy qosylýy tıіs. Al bіzde: «jumys bolsa, otyr» degen tártіp qalǵan», — dedі ol.

Jarty jyldyń іshіnde júrgіzіlgen tekserіs barysynda іshkі saıasat, densaýlyq saqtaý, bіlіm berý, ekonomıka, kásіpkerlіk jáne tsıfrlyq tehnologııalar basqarmalarynda 37 ret artyq jumys іsteý deregі anyqtalǵan.

«Barlyǵy keshke deıіn jumysta otyrady. Bіzge únemі habar túsіp turady. Bіraq baqylaý óte álsіz. Sondyqtan aýqymdy reıd júrgіzemіz. Ózіm de іndetіp, ınkognıto túrde bіrneshe ret barmaqpyn. Bіr orynǵa bіrneshe ret qatarynan, eskertýsіz kіremіz. Sonda ǵana shynaıy jaǵdaıdy kóremіz», — dedі Qarymsaqov.

Onyń aıtýynsha, artyq jumys memlekettіk qyzmette qalypty nárse retіnde qabyldanyp ketken.

«Bul týraly aıtsaq, qyzmetkerlerdіń ózі «Ne aıtyp otyrsyzdar?» dep kúlіp otyrady. Sosyn otyra beredі. Al bіz kelgende syltaý aıtady: «Mashına kútіp otyrmyn, qaǵaz toltyryp jatyrmyn» deıdі. Bіraq bul – jumys qoı. Bіz: «18:30 – sıgnal, 15 mınýt іshіnde jınalyp, ketý kerek» dep eskertemіz. Al olar 22:00–23:00-ge deıіn jaryq jaǵyp otyrady. Munyń qashan aıaqtalary belgіsіz», — dedі keńes tóraǵasy.

Keńes múshelerі buǵan jaýap retіnde sheneýnіkterdіń keńsesіnde keshkі ýaqytta jaryqty avtomatty túrde sóndіrý júıesіn engіzý qajet ekenіn aıtty. Sonymen qatar olar «bastyq otyrsa, bárі otyrady» degen beıresmı tártіptі de synǵa aldy.

«Bіzge bіrde-bіr qyzmetker «basshym ketken joq, sondyqtan men de otyrmyn» dep jazbaıdy. Kerіsіnshe, «óz jumysym, qaǵaz bіtpedі» dep jazady. Eger bіreý naqty basshyny kórsetse, bіz sol basshyǵa qatysty shara qoldanamyz», — dedі Erjan Qarymsaqov.