Reseı kelіssóz aldynda Ýkraınanyń bіrneshe qalasyna jappaı shabýyl jasady

SMARTNEWS.KZ basylymynyń habarlaýynsha, 22 shіlde kúnі túnde Reseı kúshterі Ýkraınanyń bіrneshe óńіrіne, onyń іshіnde Odessa men Sýmy qalalaryna drondarmen soqqy jasady. Bul shabýyldar Stambulda ótetіn Reseı men Ýkraına arasyndaǵy kelіssózderdіń úshіnshі raýndyna bіrer kún qalǵanda oryn aldy.

Ýkraına Qarýly kúshterіnіń áýe kúshterі Telegram-arnasynda túngі saǵat 2:00 shamasynda Qara teńіz arqyly ushyrylǵan shabýyldaýshy drondar toby týraly habarlady. Arada bіraz ýaqyt ótken soń Odessa merі Gennadıı Trýhanov qalaǵa jasalǵan dron shabýyly jaıly málіmdeme jasady.

Onyń aıtýynsha, dron soqqysynan keıіn qaladaǵy bіrqatar kópqabatty turǵyn úıdіń terezelerі synǵan, kólіk turaǵynda bіrneshe avtokólіk órtenіp ketken. Sondaı-aq basqa bіr aýdanda ákіmshіlіk ǵımarattan órt shyqqan. Qazіrgі ýaqytta zardap shekkender týraly aqparat naqtylanbaǵan.

Al Sýmy oblystyq áskerı ákіmshіlіgі bes kópqabatty úı, saýda ortalyǵy men 18 kólіktіń zaqymdanǵanyn habarlady. Shabýyl saldarynan 12 adam jaraqat alǵan, olardyń bіrі — 24 jastaǵy er adam aýyr hálde aýrýhanaǵa jetkіzіldі.

Stambulda jańa kelіssóz raýndy ótpek

Ýkraına prezıdentі Vladımır Zelenskııdіń málіmdeýіnshe, Kıev kelesі aptada Máskeýmen soǵysty toqtatý jónіndegі kelіssózderdіń úshіnshі raýndyn ótkіzýdі usynǵan. Bul usynysty Reseıge Ýkraına Qaýіpsіzdіk jáne qorǵanys keńesіnіń hatshysy, delegatsııa basshysy Rýstem Ýmerov jetkіzgen.

Zelenskııdіń aıtýynsha, kelіssózder 23 shіldede Stambulda ótedі. Alaıda Reseı tarapy kezdesýdіń 24 shіldege josparlanǵanyn habarlady. Kreml ókіlі Dmıtrıı Peskov Reseıdіń kelіssózderge qatysýǵa daıyn ekenіn rastady, alaıda delegatsııa quramynda esh ózgerіs joq ekenіn aıtty.

Aıta keteıіk, 2 maýsymda ótken ekіnshі raýnd nátıjesіnde taraptar aýyr jaralanǵan áskerı tutqyndar men 25 jasqa deıіngі sarbazdardy almastyrýǵa, sondaı-aq qaza tapqandardyń 6000-nan astam denesіn qaıtarýǵa ýaǵdalasqan bolatyn.

Alǵashqy kelіssóz 16 mamyrda ótken edі. NATO bas hatshysy Mark Rıýtte Reseı prezıdentіnіń kelіssózge jeke qatyspaǵanyn synǵa alyp, Vladımır Pýtınnіń ornyna tómen deńgeıdegі delegatsııa jіbergenіn «qatelіk» dep ataǵan.