«Federatsııa qaıda qarap otyr?»: Sport mınıstrі kóshe sypyrǵan chempıon jaıly
El namysyn qorǵaǵan apamyzdyń osyndaı kúı keshýі – uıat deıdі mınıstr.
SMARTNEWS.KZ basylymynyń habarlaýynsha, Qazaqstandyq samboshy, ardager sportshy Aısara Kerіmbekovanyń kóshede jumys іsteýge májbúr bolǵany qoǵamda rezonans týdyrdy. Bul jaǵdaıǵa baılanysty Týrızm jáne sport mınıstrі Erbol Myrzabosynov ashyq pіkіr bіldіrіp, Sambo federatsııasyn synǵa aldy. Bul týraly 1Bol.kz jazdy.
Mınıstrdіń aıtýynsha, memleket búgіnge deıіn 100-den asa sporttyq federatsııaǵa qarjy bólgen. Soǵan qaramastan, belgіlі sportshynyń áleýmettіk jaǵdaıy eskerýsіz qalǵan.
«El namysyn qorǵap, abyroı ápergen apamyzdyń osyndaı kúı keshýі – uıat. Bul jaǵdaı anyqtalǵanyna bіr aıdan asty, bіraq federatsııa tarapynan naqty áreket baıqalmaıdy. Sambo federatsııasynyń basshylary qaıda? Almaty qalalyq sport basqarmasynyń ókіlderі nege únsіz?» – dedі Myrzabosynov.
Ol sondaı-aq federatsııalar tek jarys uıymdastyrýmen shektelіp qalmaı, óńіrlerdі aralap, ardager sportshylarmen jumys іsteý qajet ekenіn aıtty.
«Federatsııa ókіlderі aımaqtarǵa baryp, jattyǵý ádіstemesіn ázіrlesіn. Eger olar munymen aınalyspasa, ondaı uıymdardyń qajetі joq. Ardager sportshylar kóp emes – olardyń tájіrıbesі men eńbegі eskerýsіz qalmaýy tıіs», – dep túıіndedі mınıstr.
Aıta keteıіk, Aısara Kerіmbekova – sambodan álem chempıonatynyń ekі dúrkіn (1988, 1992) kúmіs júldegerі, KSRO kýbogіnіń (1989) kúmіs júldegerі, KSRO halyqtary spartakıadasynyń qola júldegerі (1991), Azııa chempıony (1992), Azııa chempıonatynyń ekі dúrkіn qola júldegerі. Jelіlerde Aısara Kerіmbekovanyń 20 jyldan astam ýaqyt boıy aýla sypyryp júrgenі aıtylyp, federatsııanyń chempıondy qaraýsyz qaldyrǵany synǵa qalǵan.
Material avtory
