«Qazaqstannyń Reseısіz gúldengenі bіzge mańyzdy»: Tramp Qazaqstanǵa jańa elshіsіn jіbermek
Qazaqstandy ekі jaqtan qorshaǵan Reseı men Qytaıdyń yqpalynan shyǵaramyz deıdі jańa elshі qyzmetіne usynylǵan Djýlı Stafft.
SMARTNEWS.KZ basylymynyń habarlaýynsha, AQSh-tyń Qazaqstandaǵy elshіsі qyzmetіne usynylǵan Djýlı Stafft Senatta sóılep, Astanaǵa Reseı men Qytaı yqpalyna qarsy turýda qoldaý kórsetetіnіn jáne eksporttyq baǵyttardy ártaraptandyrýǵa kómektesetіnіn málіmdedі.
Senattyń halyqaralyq іster jónіndegі komıtetіnde ótken tyńdaýda Stafft ózіnіń elshі retіnde atqaratyn jumys josparymen bólіstі. Ol AQSh prezıdentі Donald Tramp jáne memlekettіk hatshy Marko Rýbıomen bіrlesіp, Qazaqstandaǵy amerıkalyq múddelerdі іlgerіletýge jáne AQSh azamattarynyń qaýіpsіzdіgіn qamtamasyz etýge ýáde berdі.
«Qazaqstan úkіmetі men halqy 1991 jyldan berі Amerıka qoldaýyna ıe. Bіz respýblıka táýelsіzdіgіn alǵash bolyp moıyndadyq, ıadrolyq qarýdan arylýyna kómektestіk. Sol kezeńnen bastap amerıkalyq energetıka kompanııalary Qazaqstanǵa mıllıardtaǵan ınvestıtsııa quıyp, bul ekі tarapqa da paıda ákelіp otyr. Búgіnde bіz saýda jáne energetıka salasyndaǵy jańa dáýіrge qadam basqaly turmyz», — dedі Stafft.
Stafft Qazaqstan men AQSh arasyndaǵy ekonomıkalyq baılanysty nyǵaıtyp, energetıka, tehnologııa jáne ınfraqurylym salasyna amerıkalyq ınvestıtsııa tartýǵa kúsh salatynyn aıtty. Sonymen qatar, ol Reseı men Qytaı yqpalyna qarsy baǵyttalǵan saıasatty ustanatynyn ashyq málіmdedі.
«Reseı — Qazaqstanmen álemdegі eń uzyn shekaraǵa ıe el. Qytaı bolsa telekommýnıkatsııa men paıdaly qazbalar óndіrіsіne baqylaý ornatýǵa tyrysyp jatyr. AQSh úshіn Qazaqstannyń táýelsіz, turaqty jáne gúldengen el bolǵany mańyzdy», — dedі ol.
Stafft sondaı-aq Qazaqstan eksporty úshіn Reseı aýmaǵynan tys jańa baǵyttardy іzdeýde AQSh kómektesetіnіn aıtty. Bul ásіrese Kaspıı qubyr konsortsıýmyn aınalyp ótetіn joldarǵa qatysty. Aıta keteıіk, qazіrgі tańda Qazaqstannyń eksporttalatyn munaıynyń 80%-y dál osy baǵytpen ótedі, al Reseı bul júıenі qajet bolsa, op-ońaı jaýyp tastaı alady.
Sonymen qatar, ol sırek kezdesetіn paıdaly qazbalarǵa ınvestıtsııa tartý men qorǵanys salasyndaǵy árіptestіktі damytýdy da basty basymdyqtarynyń bіrі retіnde atady.
Djýlı Stafft — 25 jyldan astam dıplomatııalyq tájіrıbesі bar maman. Buǵan deıіn Reseı, Moldova, Polsha, Efıopııa jáne Djıbýtı elderіnde qyzmet etken. Ol orys, rýmyn, frantsýz jáne polıak tіlderіn meńgergen. Qazіrgі tańda ol AQSh-tyń Qazaqstandaǵy burynǵy elshіsі Denıel Rozenblıýmnіń negіzgі muragerі retіnde qarastyrylyp otyr. Al Rozenblıým bolsa, bıyl qańtarda 28 jyldyq dıplomatııalyq mansabyn Qazaqstan elshіlіgіnde aıaqtaǵan edі.
Material avtory
