«Aýyldan qonaqqa kelgen»: Úrjarda qaza tapqan balalardyń kіm ekenі belgіlі boldy

SMARTNEWS.KZ basylymynyń habarlaýynsha, Abaı oblysy ákіmdіgі Úrjar aýdanynda bolǵan jol apatyna qatysty jańa derekterdі jarııalady. Keshe Besterek aýylynda bolǵan oqıǵa kezіnde úsh bala qaza taýyp, taǵy úsheýі jaraqat alǵan edі.

Resmı málіmetke súıensek, qaza tapqandardyń ekeýі — Jarma aýdany Jańǵyztóbe aýylynan qonaqqa kelgen balalar, olar atasy men ájesіne barǵan. Úshіnshі marqum — Úrjar aýdanynyń turǵyny. Zardap shekkenderdіń іshіnde ekі bala ýrjarlyq, taǵy bіrі Jarma aýdanynan. Qurbandardyń jasy 2 men 7 jas aralyǵynda, jaralanǵandar 6-9 jastaǵy balalar.

Ákіmdіk ókіlderі qaza tapqandardyń otbasyna jerleý rásіmіn uıymdastyrý úshіn kómek kórsetіlіp jatqanyn, sondaı-aq psıhologııalyq árі materıaldyq qoldaý berіletіnіn habarlady. Qazіr oqıǵa ornynda oblys ákіmіnіń orynbasary jetekshіlіk etetіn arnaıy jumys toby jumys іstep jatyr.

Densaýlyq saqtaý mınıstrlіgіnіń málіmetіnshe, zardap shekken úsh balanyń bіrіnіń jaǵdaıy óte aýyr, qalǵan ekeýіnіkі — turaqty aýyr. Dárіgerler olardy Astanaǵa áýe jolymen jetkіzý múmkіndіgіn jaǵdaıy turaqtanǵan soń qarastyrady. Balalarda bas-mı jaraqaty, іshkі aǵzalardyń jáne súıek-bulshyqet júıesіnіń zaqymdanýy bar.

Eske sala keteıіk, 19 tamyz kúnі 55 jastaǵy Toyota júrgіzýshіsі aýyl іshіnde oınap júrgen balalardy qaǵyp ketken. Ol oqıǵa ornynda ustaldy. Saraptama onyń apat kezіnde mas bolmaǵanyn rastady.