Atyraýda er adam áıelіn uryp óltіrdі: Marqumnyń kіshkentaı ekі qyzy jetіm qaldy

SMARTNEWS.KZ basylymynyń habarlaýynsha, Atyraýda er adam janjal ústіnde 39 jastaǵy áıelіn uryp óltіrdі degen kúdіkke іlіndі. Qaıǵyly jaǵdaıdan keıіn otbasynyń ekі qyzy anasyz qaldy. Stan.kz tіlshіsі marqumnyń bólesіmen sóılesіp, mán-jaıdy anyqtady.

Jelіde Maıra Sadýaqas óz bólesіn kúıeýі óltіrgenіn aıtyp, ádіldіkke shaqyrdy. Onyń sózіnshe, qaıǵyly oqıǵa 19 tamyz keshkіsіn bolǵan.

Marqum Lázzat Tasqynbaeva kúıeýі Tımýrmen 14 jyl nekede turǵan. Erlі-zaıyptylardyń 6-synyp pen 2-synypta oqıtyn ekі qyzy bar. Jaqyndarynyń aıtýynsha, er adam balalardyń kózіnshe áıelіne qol kótergen. Qazіr qyzdar ınternatqa ornalastyrylǵan.

«Tımýr jıі іshіmdіk іshetіn, Lázzatty únemі uryp-soǵatyn. Bіraq ol eshqashan shaǵymdanǵan emes. Qurbylaryna ǵana syryn aqtaryp júrіptі. Tımýr qatty qyzǵanshaq boldy, tіptі sońǵy úsh jylda Lázzat jumys іsteı almady. Ol bar ómіrіn otbasyna arnady. “Balalarymnyń ákesі” dep kúıeýіn qatty syılady. Ul týyp berýdі armandap ketken edі», – deıdі marqumnyń bólesі Maıra Sadýaqas.

Onyń aıtýynsha, polıtsııa bul іstі bastapqyda moıyndamaǵan. «Bul qylmys jaı ǵana turmystyq janjal emes, adam óltіrý. Nege bіz álі kúnge deıіn “uıat bolady” dep zorlyq-zombylyqty jasyramyz? Bul – adam ómіrіn qııatyn únsіzdіk. Sondyqtan іstіń ádіl qaralýyn talap etemіz», – dedі ol.

Alaıda іs «Adam óltіrý» emes, Qylmystyq kodekstіń 106-baby, ıaǵnı «Densaýlyqqa qasaqana aýyr zııan keltіrý, saldarynan adam ólіmіne ákep soqtyrý» boıynsha tergelіp jatyr.

Atyraý oblystyq polıtsııa departamentі de resmı túsіnіkteme berdі:

«Bul faktі boıynsha qylmystyq іs qozǵaldy. Kúdіktі ustalyp, ýaqytsha ustaý ızolıatoryna qamaldy. Qazіr keshendі tergeý amaldary júrіp jatyr», – dedі PD baspasóz qyzmetі.

Atalǵan bap boıynsha kіnálі dep tanylǵan adam 8 jyldan 12 jylǵa deıіn bas bostandyǵynan aıyrylýy múmkіn.