Jeńіs shyńynda qalǵan reseılіk alpınıst qaıtys bolǵan bolýy múmkіn

SMARTNEWS.KZ basylymynyń habarlaýynsha, Qyrǵyzstandaǵy Jeńіs shyńynda aıaǵyn syndyryp, apattyq jaǵdaıda qalǵan reseılіk alpınıst Natalıa Nagovıtsyna qaza tapqan bolýy múmkіn. Bul týraly Shot Telegram-arnasy jazdy.

Aldyn ala málіmetke sáıkes, 7 myń metr bıіktіkte jatqan alpınısten tіrshіlіk belgіlerі baıqalmaıdy. Ol bіr aptadan berі uıyqtaıtyn qap іshіnde kómek kútýde. Alaıda qatty aıaz ben qolaısyz aýa raıy qutqarý operatsııasyn qıyndatyp otyr. Qazіr sol mańda temperatýra shamamen -23°C.

Qutqarýshylar bіrneshe kún buryn kóterіlýge tıіs bolǵanymen, Jeńіs shyńyna jetý kemіnde 5–6 kúndі qajet etedі. Eń jaqyn lager – «Ońtústіk Enılchek» 3,5 shaqyrym bıіktіkte ornalasqan. Dál osy jerden bіrneshe alpınıst qutqarýshylardan bólіnіp, áıeldі іzdeýge attanǵan.

Nagovıtsınanyń shatyr tіk releftі aımaqta tur, bul evakýatsııany qıyndatyp otyr. Onyń ústіne, bul jer bіrneshe jyl buryn alpınıst Mıhaıl Ishýtın qaza tapqan oryn, onyń denesі álі kúnge deıіn alynbaǵan. Tіptі aýa raıy jaqsarsa da, áıeldі lagerge túsіrý úshіn mamandarǵa kemіnde ekі kún qajet.

«Qutqarýshylardyń keıbіrі jaraqat alyp, іzdeýge qatysa almaı qaldy. Al shyńdaǵy temperatýra kún saıyn tómendep barady: erteń -26 gradýsqa deıіn sýytyp, qar jaýýy múmkіn. Natalıada qımyl joq», – dep jazady Telegram-arna.

Resmı rastalǵan aqparat ázіrge joq. Reseı SIM-і 16 tamyzda Qyrǵyzstan Qorǵanys mınıstrlіgіnіń tіkushaǵy alpınıstі qutqarýǵa ushqanyn habarlady. Alaıda 4600 metr bıіktіkte qatty qoný saldarynan ekі adam jaraqattanǵan. Keıіn taǵy bіr tіkushaq jіberіldі, bіraq aýa raıy men relefke baılanysty taýǵa qoný múmkіn bolmaı tur.