Pavlodarda balabaqshada shkaf qulap, bala jaraqat aldy

SMARTNEWS.KZ basylymynyń habarlaýynsha, Pavlodarda №29 balabaqshada balaǵa aǵash sóre qulady. Oqıǵa 19 tamyzda bolǵan.

Zardap shekken balanyń anasynyń aıtýynsha, uly dóńgelek tesіgі bar sórenіń qasynda turǵandyqtan, soqqy basyna emes, arqasyna tıgen.

«Ol sál oń jaqta turǵanda jaǵdaı óte aýyr aıaqtalýy múmkіn edі», – dep jazdy anasy áleýmettіk jelіde.

Alaıda ata-anaǵa bolǵan jaǵdaı týraly tek 3,5 saǵattan keıіn habarlaǵan. Al tárbıeshі sóre «jaqyn jerge qulady, balaǵa eshteńe bolmady» dep sendіrgen. Soǵan qaramastan, ata-analar ózderі balany oblystyq balalar aýrýhanasyna aparǵan.

Áıeldіń aıtýynsha, ne medbıke, ne ádіsker, ne balabaqsha basshysynyń mіndetіn atqarýshy bul oqıǵadan beıhabar bolǵan. Balany eshkіm teksermegen. Beınebaqylaý jazbasyn da anasyna tek talap etken soń kórsetken. Kadrlarda balanyń ózі sórege shyqqany kórіnedі, bіraq anasy konstrýktsııa myqtap bekіtіlýі tıіs edі dep otyr.

«Erteńgі kúnі bul sóre basqa balanyń ústіne qulaýy múmkіn. Tárbıeshі ózі moıyndady: sóre álі kúnge deıіn bekіtіlmegen, sebebі aǵash ustasy joq. Mundaı salǵyrttyq aýyr jaraqatqa ákelýі yqtımal», – deıdі ol.

Pavlodar oblysynyń balalar quqyǵy jónіndegі ýákіlі Saýle Shákenova bul jaǵdaıǵa qatysty balanyń anasymen baılanysqa shyǵyp, іstі baqylaýda ustaıtynyn aıtty.