Reseı Eýropalyq azaptaýǵa qarsy konventsııadan shyǵýǵa daıyndalýda
Pýtın bılіgі adamdy azaptaý men qorlaýdy qoldamaq.
SMARTNEWS.KZ basylymynyń habarlaýynsha, Reseı bılіgі Eýropalyq azaptaýǵa jáne adamdy qorlaıtyn qarym-qatynasqa tyıym salý týraly konventsııadan bas tartpaq. Bul bastama prezıdent Vladımır Pýtınge usynyldy. Tıіstі qaýlyǵa Reseı premer-mınıstrі Mıhaıl Mıshýstın qol qoıǵan. Endі qujatty denonsatsııalaý týraly joba parlament qaraýyna jіberіledі.
Atalǵan konventsııany Eýropa Keńesі 1987 jyly qabyldaǵan. Reseı ony 1996 jyly ratıfıkatsııalaǵan bolatyn. Alaıda Ýkraınaǵa tolyqqandy basyp kіrýden keıіn (2022 jyldyń aqpanynda) Máskeý halyqaralyq uıymdar men kelіsіmderden bіrtіndep shyǵa bastady. Buǵan deıіn Reseı Eýropa Keńesіnen shyqty, Eýropalyq adam quqyqtary jónіndegі konventsııaǵa qatysýdan bas tartty jáne Eýropalyq sottyń sheshіmderіn oryndamaıtynyn málіmdedі. Eýropalyq azaptaýǵa qarsy konventsııa da osy uıymnyń baqylaýynda.
Bul qujattyń negіzgі tetіkterіnіń bіrі – múshe memleketterge komıtet ókіlderіnіń túrmeler men basqa da qamaý oryndaryna kedergіsіz kіrýіne ruqsat berý.
Buǵan deıіn komıtet Reseıdіń atalǵan konventsııany buzǵany týraly bіrneshe esep jarııalaǵan. Sońǵy esep 2024 jyldyń qarashasynda shyqty. Onda oppozıtsıoner Alekseı Navalnyıdyń kolonııadaǵy ólіmі de qozǵalǵan edі. Ol kezde Reseı SIM bul eseptі «saıasılanǵan» dep baǵalap, «Reseıdіń Eýropa Keńesіnen shyǵýy nemese ózge de konventsııalardy toqtatýy eldegі adam quqyqtaryn qorǵaý deńgeıіne áser etpeıdі» degen málіmdeme jasaǵan.
Material avtory
