«Ózbek sındromyn» ózіmіz qalyptastyrdyq» – Baqyt Sársekbaev
Belgіlі sportshy qazaq boksynyń erekshelіgіn joǵaltyp aldyq deıdі.
SMARTNEWS.KZ basylymynyń habarlaýynsha, 2008 jylǵy Beıjіń Olımpıadasynyń chempıony, qazіr Qazaqstan U22 quramasynyń bas bapkerі Baqyt Sársekbaev qazaq boksynyń búgіngі jaǵdaıyna qatysty pіkіr bіldіrdі.
Sport talks podcast YouTube-arnasyna suhbat bergen ol «qazaq boksshylary arasynda ózbek sındromy bar ma?» degen saýalǵa jaýap qatty.
«Ózіmіz ózbek quramasyn asyra dárіptep, ózіmіz sol «sındromdy» qalyptastyryp otyrmyz. Shyn mánіnde, ózbek boksy aıtarlyqtaı ózgergen joq — sol baıaǵy kúshke súıenetіn stılde qalyp qoıdy. Tek bіr nárse bar: olar bіzge ózderіnіń stılіn tańyp úlgerdі.
Qazaq boksy árdaıym aıaqpen jumys іsteýіmen, aldamshy qımyldarymen, túrlі taktıkalarymen erekshelenetіn. Bіz osyny joǵaltyp aldyq. Sondyqtan bіzge komandalyq oryndar úshіn talasýdy doǵarý kerek. Bіzdіń basty jarystarymyz — Azııa oıyndary men Olımpıada. Al kіm kóp, kіm az medal aldy dep sanaý — basty kórsetkіsh emes», – dedі bapker.
Aıta keteıіk, Baqyt Sársekbaev Pavlodar oblysynda týǵan. Balalyq shaǵyn Tashkent oblysyndaǵy Tabaqsaı aýylynda ata-ájesіnіń qolynda ótkіzgen. Boksqa 12 jasynda kelgen. Onyń alǵashqy іrі halyqaralyq jeńіsі — «Sıdneı Djekson memorıaly». Qazaqstan quramasyna aýysqanǵa deıіn ol jetі márte Ózbekstan chempıony bolǵan.
Material avtory
