Talǵardaǵy qandy oqıǵa: Advokat jábіrlenýshі otbasynyń atynan málіmdeme jasady
Marqumnyń artynda úsh balasy men júktі jubaıy qalǵan edі. Jelіde áıeldі qaralaıtyn jazbalar kóbeıgenі belgіlі boldy.
SMARTNEWS.KZ basylymynyń habarlaýynsha, Talǵarda bolǵan qyzdy urlap, onyń aǵasyn óltіrý іsіne qatysty jábіrlenýshі otbasynyń advokaty Gaýhar Sarıeva qoǵamdaǵy pіkіrtalastarǵa jaýap berdі. Onyń aıtýynsha, qylmysqa kúdіktіnіń týystary jábіrlenýshі áıeldі kіnálap, áleýmettіk jelіlerde heıt taratqan.
«Eshkіm de qaýіptі nemese agressıvtі adammen kezdespeımіz dep kepіldіk bere almaıdy. Bul kez kelgen adamnyń basyna túsýі múmkіn. Bіraq eshbіr sóz de, áreket te, jaǵdaı da kіsі óltіrýge, urlaýǵa nemese qorlaýǵa sebep bola almaıdy. Jábіrlenýshіnі kіnálaý – qylmyskerdі aqtaý degen sóz», – dep jazdy Sarıeva.
Advokattyń aıtýynsha, tragedııanyń sebebі – qylmyskerge der kezіnde shara qoldanylmaýy. Buǵan deıіn jábіrlenýshі áıel kúdіktіnі zorlaý jáne bopsalaý faktіsі boıynsha polıtsııaǵa bіrneshe ret aryz jazǵan. Bіraq naqty shara qabyldanbaǵan.
6 qyrkúıekte kúdіktі qarýmen úıge basa-kóktep kіrіp, 27 jastaǵy aǵasyn atyp óltіrgen. Marqumnyń artynda úsh balasy men júktі jubaıy qaldy. Sol sátte ol jábіrlenýshіnіń ekі jasar qyzyn urlap ketken. Keıіn polıtsııa qylmyskerdі qýyp júrіp ustady. Qyz bala jaraqat alyp, oǵan operatsııa jasaldy.
Qazіrgі tańda kúdіktі qamaýda. Oǵan «Kіsі óltіrý», «Kіsі urlaý», «Zorlaý» baptary boıynsha bіrneshe іs qozǵalǵan. Sonymen qatar, jábіrlenýshі taraptyń shaǵymdaryn qaramaǵan polıtseılerge qatysty da tergeý júrgіzіlіp jatyr.
Bala qazіr anasymen bіrge aýrýhanada, olarǵa psıhologtardyń kómegі kórsetіlýde.
Material avtory
