«Qol qoımaǵany úshіn jabylyp urǵan»: Jarkentte qaza tapqan kapıtannyń ákesі shyndyqty aıtty
26 jastaǵy Darhan Dáýlet azaptalyp óltіrіlgenі belgіlі bolǵan edі.
SMARTNEWS.KZ basylymynyń habarlaýynsha, Jarkent garnızonynda 2024 jyldyń qarashasynda qaza tapqan kapıtan Darhan Dáýlettіń ákesі ulynyń ólіmіne qatysty óz shyndyǵyn Qazaq Airan arnasyna bergen suhbatynda aıtty. Onyń aıtýynsha, uly áskerı saladaǵy zańsyzdyqtarǵa qarsy shyqqany úshіn mert bolǵan.
26 jastaǵy Darhan Dáýlet Qurlyq áskerlerіnіń áskerı ınstıtýtyn qyzyl dıplommen támamdap, Otardaǵy áskerı bólіmde bes jyl qyzmet etken. 2024 jyldyń qyrkúıegіnde Jarkentke aýysyp, ınjenerlіk qyzmettіń bastyǵy bolyp taǵaıyndalǵan.
Ákesі Nurlan Maqaevtyń aıtýynsha, uly áskerı tehnıkaǵa qatysty janar-jaǵarmaı, qarý-jaraq pen basqa da buıymdardy «joıyldy» dep rásіmdeýge kelіsіm bermegen.
«Sol qujatqa qol qoımaǵany úshіn ony nysanada kútіp alyp, bіrneshe adam jabylyp soqqyǵa jyqqan. Basynan temіrmen uryp, qol-aıaǵyn baılap, dalaǵa tastaǵan. Ulymdy qorlap óltіrgen», – deıdі ol.
Marqumnyń ákesі sot protsesіnіń ádіl ótpegenіne de narazy. Onyń aıtýynsha, oqıǵaǵa kýá bolǵandardyń kóbі «eshteńe kórmedіk» dep jaýap berse, tek bіrneshe sarbaz shyndyqty aıtqan.
Qylmystyq іs boıynsha 1988 jyly týǵan maıor Darhan Qaztaı 15 jylǵa sottaldy. Sonymen qatar 19–20 jastaǵy úsh sarbaz – Baqbergen Rýstamuly men Aıat Shakır 12 jylǵa, Nurman Ábsadyq 10 jylǵa bas bostandyǵynan aıyryldy.
Alaıda Nurlan Maqaev úkіm tym jeńіl bolǵanyn aıtyp, aıyptylardyń bárіne kemіnde 20 jyl jaza berіlýі tıіs edі dep sanaıdy.
«Ulym búkіl ómіrіn áskerı qyzmetke arnady. Elge adal bolamyn dep júrіp, jazyqsyz qaza tapty. Mundaı tártіpsіzdіk pen beıbereketsіzdіk bolsa, erteń taǵy qansha ofıtserdіń ómіrі qıylady?» – deıdі sherlі áke.
Material avtory
