Qazaqstandyq altyn óndіrýshі sanktsııalardyń kesіrіnen tabystyń jartysynan aıyryldy

SMARTNEWS.KZ basylymynyń habarlaýynsha, Solidcore Resources (burynǵy Polymetal) kompanııasy Reseıge altyn kontsentratyn jetkіzýdegі qıyndyqtar saldarynan bıylǵy alǵashqy jartyjyldyqtaǵy paıdasynyń 58 paıyzyn joǵaltty. Bul týraly Reuters jazdy.

Kompanııanyń bas dırektory Vıtalıı Nesıstіń aıtýynsha, jaǵdaı shіlde-tamyz aılarynda «edáýіr jaqsarǵan». Onyń pіkіrіnshe, álemdіk naryqtaǵy rekordtyq baǵa shyǵyndy az da bolsa ótep otyr.

Alaıda qymbatshylyqtyń áserіnen Solidcore Ortalyq Azııadaǵy jańa altyn jáne mys kenіshterіn satyp alý josparlaryn keıіnge qaldyrdy. Nesıs mámіlelerdіń «nashar jaǵdaıda» ekenіn, sebebі kenіsh ıelerі qunyn tym kóterіp jіbergenіn aıtty.

Solidcore 2026 jyldyń bіrіnshі toqsanynda qordaǵy altynnyń bіr bólіgіn satýdy kózdep otyr. Qazіr altyn baǵasy jyl basynan berі shamamen 40 %-ǵa ósіp, ótken aptada tarıhı rekord – 3 673,95 dollar/ýntsııa deńgeıіne jettі.

«2025 jyly altyn baǵasy óndіrіstіń 11 %-ǵa tómendeýіn aıtarlyqtaı óteıdі. Degenmen jyl sońyna qaraı baǵa 3,2 myń dollarǵa deıіn túsýі múmkіn», – dedі Nesıs.

Kompanııa Reseıdegі aktıvterіn 2024 jyly satyp jіbergenіmen, AQSh bılіgіnen arnaıy ruqsat alyp, kontsentratty sol elge óńdeýge jóneltýdі jalǵastyryp keledі. Bul kelіsіm 2028 jylǵa deıіn kúshіnde bolady. Sol ýaqytqa qaraı Solidcore Ertіs gıdrometallýrgııalyq kombınatyn (Irtysh GMK) іske qospaq. Jobaǵa 500–600 mln dollar qarjy tartý jospary bar.

Solidcore — Qazaqstandaǵy eń іrі altyn óndіrýshіlerdіń bіrі. Kompanııanyń negіzgі óndіrіs oryndary — Abaı oblysyndaǵy «Qyzyl» (Baqyrshyq) ken orny jáne Qostanaı oblysyndaǵy Varvarınskıı haby. Bıyl naýryzda kompanııa soltústіkte ornalasqan Toqtar altyn ken ornyn satyp alatynyn habarlaǵan. Bіraq rekordtyq baǵaǵa baılanysty bul kelіsіmnіń júzege asýy álі belgіsіz.