«Áýelі aqsha ber, sosyn kómektesemіn»: Qaıyrymdynyń keıpіndegі bloger іsі áshkere boldy

SMARTNEWS.KZ basylymynyń habarlaýynsha, Almatyda ózіn áleýmettіk jelіde «qazaq_robin_hood» dep tanystyrǵan Ilıas Sárıev sot aldynda jaýap berіp jatyr. Ol basqaratyn «Halyqqa kómek» qorynyń atyna jınalǵan kúmándі áreketter kópbalaly analardyń shaǵymynan keıіn áshkere boldy. Bul týraly Orda.kz jazdy.

Sárıevke Qylmystyq kodekstіń 190-baby, 3-bólіmі, 4-tarmaǵy («Irі kólemde alaıaqtyq») boıynsha aıyp taǵyldy. Istі Almaly aýdandyq soty qaraýda.

Zalǵa arnaıy kelgen jábіrlenýshіlerdіń bіrі Aıman Júrgenbaeva úsh jasar, sal aýrýyna shaldyqqan qyzyna kómek suraǵan. Onyń aıtýynsha, Sárıev naýryz aıynda úıіne kelіp, balanyń jaǵdaıymen tanysqan soń, qaıyrymdylyq jınaýdy bastaımyn dep sendіrgen. Bіraq «jumysy úshіn» 1,5 mln teńge talap etken.

«Mende ondaı aqsha bolmaǵan soń, bólіp tóleýge bola ma dep suradym. Ol kelіstі. Aqyry 750 myń teńge berdіm. Bul qarjy qyzyma ota jasatý úshіn elden jınalǵan aqsha bolatyn. Bіraq ýáde etken vıdeony túsіrmedі, eshqandaı qor ashpady», – dedі Júrgenbaeva.

Taǵy bіr zardap shekken áıel – Venera Sultanqyzy. Ol da qyzynyń emі úshіn Sárıevke senіp, qomaqty qarjy bergenіn aıtty.

«Alǵashynda kómektesemіn dedі, bіraq 1,5 mln teńge surady. 500 myń teńgenі onyń serіktesterіnіń atyna aýdardym. Keıіn taǵy 50 myń teńge jol shyǵynyna berdіm. Bіraq ne vıdeo shyqpady, ne qor ashylmady. Aqyry ol joq bolyp kettі. Aqshany nesıege alyp edіm», – dedі Sultanqyzy.

Keıbіr jábіrlenýshіler onlaın qosylyp otyrdy, sebebі olar ártúrlі óńіrden. Kóbі «aqshamyzdy qaıtaryp berse, keshіrýge daıynbyz» dep málіmdedі.

Kelesі sot otyrysy 25 qyrkúıekke belgіlendі.