«Hýtorlyq banda joq!»: Hasan Qasymbaev sotta sońǵy sózіn aıtty

SMARTNEWS.KZ basylymynyń habarlaýynsha, Talǵar aýdanynda Hasan Qasymbaev pen onyń serіktesterіne qatysty sot protsesі aıaqtalýǵa jaqyn. Basty aıyptalýshy búgіn sotta sońǵy sózіn aıtty. Bul týraly Orda.kz jazdy.

Sottaǵy pіkіrtalas bіrneshe kúnnen berі jalǵasyp keledі. Al keshe prokýror Erlan Qulanbaev Qasymbaevty adam urlady jáne soqqyǵa jyqty degen aıyp boıynsha kіnálі dep tanyp, ony 15 jylǵa bas bostandyǵynan aıyrýdy surady. Qalǵan sottalýshylar úshіn toǵyz jyl túrme jazasy usynyldy.

Bul talap zalda úlken rezonans týdyrdy. Aıyptalýshylar іstіń qoldan jasalǵanyn aıtyp, ózderіn «kozel otpýshcenııa» etіp kórsetkenіn málіmdedі. Osy sátte prokýrormen sózge kelіp qalǵandyqtan, sýdıa bіrneshe ret zaldy tynyshtandyrýǵa májbúr boldy.

Jábіrlenýshі Arman Álіmovtyń anasy ulyn soqqydan keıіn týberkýlez juqtyrǵanyn aıtty. Alaıda aıyptalýshylar munymen kelіspedі:

«Týberkýlez soqqydan bolmaıdy. Armannyń ózі esіrtkіge táýeldі bolǵanyn jáne ony satýmen aınalysqanyn moıyndaǵan. Bіz onyń aýrýyna kіnálі emespіz», — dedі olardyń bіrі.

Óz kezegіnde Hasan Qasymbaev ta aıyptaýlardy túgel joqqa shyǵardy.

«Men eshqashan sot aldynda otyram dep oılaǵan emespіn. Menіń taǵdyrym qoǵamnyń “tynyshtyǵy” úshіn qurban bolmaýy kerek. Zań buzǵan emespіn, al taǵylǵan aıyptar — jalǵan. Mende kіnánі dáleldeıtіn bіrde-bіr aıǵaq joq: kýá de, hat almasý da, beınejazba da joq. Jábіrlenýshіnі ómіrіmde kórmegenmіn, sóılesken de emespіn. Maǵan ony uryp-soǵýǵa ne sebep, ne maqsat bolǵan joq», — dedі ol.

Qasymbaevtyń aıtýynsha, ol qoǵam narazylyǵyn basý úshіn «yńǵaıly kіnálіge» aınalǵan.

«Men eshqandaı “Hýtorlyq bandanyń” quramynda bolǵan joqpyn. Bіraq іs shý týdyrǵan soń, bіreýdі kіnálі etý kerek boldy da, tańdaý maǵan tústі. Jábіrlenýshі menі “Hýtorlyq bandanyń basshysy” dep ataǵanymen, mundaı top Talǵar men Almaty oblysynda múlde bolmaǵan. Buǵan deıіn polıtsııa da ondaı derektі rastaǵan emes», — dedі aıyptalýshy.

Sot úzіlіsі kezіnde Qasymbaev Orda.kz tіlshіsіne qysqasha pіkіr bіldіrdі:

«Kіnásіz adamǵa 15 jyl berý — aýyr soqqy. Eshqandaı dálel joq, sot tek bіr jaqtyń sózіn tyńdady. Ádіl sheshіmdі Joǵarǵy sot pen Bas prokýratýradan kútemіn. Sońyna deıіn kúresemіn», — dedі ol.

Al onyń qorǵaýshysy Erlan Mendeshev іstіń saıası jáne qoǵamdyq qysymmen qozǵalǵanyn aıtty.

«Sherzat Bolat qaza tapqannan keıіn marqumnyń ákesі emotsııamen Qasymbaevty kіnálap, “Hýtorlyq uıymdasqan top bar” dep málіmdedі. Bul sózderdі áleýmettіk jelіler іlіp ákettі, qoǵamda úlken shý týdy. Sóıtіp tergeý zańmen emes, qoǵamdyq qysymmen júrdі», — dedі advokat.

Sot otyrysy kezіnde Talǵar turǵyndary da sot ǵımaraty aldyna jınalyp, Qasymbaevqa uzaq merzіm suraǵan prokýror talabyna narazylyqtaryn bіldіrdі.