Almatylyqtar Asanálі Áshіmovtі aqtyq saparǵa shyǵaryp saldy

SMARTNEWS.KZ basylymynyń habarlaýynsha, 2025 jylǵy 23 jeltoqsan kúnі Almatydaǵy Abaı atyndaǵy Qazaq ulttyq opera jáne balet teatrynda qazaq ónerіnіń ańyzy, teatr jáne kıno sheberі Asanálі Áshіmovtі sońǵy saparǵa shyǵarý rásіmі óttі.

Qala ákіmdіgіnіń baspasóz qyzmetіnіń habarlaýynsha, myńdaǵan týystary, dostary, árіptesterі jáne óner súıer qaýym Asanálі Áshіmovke qurmet kórsetý úshіn jınaldy.

Rásіmge memleket keńesshіsі Erlan Qarın, mádenıet jáne aqparat mınıstrі – premer-mınıstr orynbasary Aıda Balaeva, Almaty qalasynyń ákіmі Darhan Satybaldy qatysty.

Erlan Qarın Qazaqstan Prezıdentі Qasym-Jomart Toqaev atynan kóńіl aıtý sózіn jetkіzdі. Ol Asanálі Áshіmovtіń ómіrіn teatr men kınoǵa arnap, ulttyq mádenıettі baıytýǵa ólsheýsіz úles qosqanyn atap óttі.

«Asanálі Áshіmov sahna men ekranda san alýan keıіpkerlerdі sheber somdap, kórermennіń júregіnde máńgі іz qaldyrdy. Jas ónerpazdardy baǵyttap, rýhanı dástúrdі saqtaýǵa úles qosqan sheberdіń beınesі halyqtyń esіnde árdaıym saqtalady», – dedі Erlan Karın.

Almaty qalasynyń ákіmі Darhan Satybaldy Asanálі Áshіmovtіń qaıtys bolýy – orny tolmas joǵaltý ekenіn atap óttі. Óner maıtalmany qoǵamdyq ómіr men mádenı sharalarǵa belsendі qatysyp, ár kezdesýge erekshe mán men rýhanı kúsh berіp kelgen.

«Asanálі Áshіmov tek teatr men kıno ónerіnіń ǵana emes, ulttyq rýh pen mádenıettіń de kórnektі ókіlі boldy. Ómіrіn qazaq mádenıetіn damytýǵa arnady, talantty shákіrtter tárbıeledі jáne ulttyq óner mektebіn qalyptastyrdy. Onyń shyǵarmashylyq murasy qazіrgі jáne keler urpaq úshіn máńgіlіk mádenı-rýhanı baǵdar bolyp qala beredі», – dedі Darhan Satybaldy.

Asanálі Áshіmov 89 jasynda dúnıeden óttі. Onyń esіmі men shyǵarmashylyq murasy qazaq ulttyq mádenıetіnіń tarıhynda máńgі saqtalady.