Shymkentte jol apaty jappaı tóbeleske ulasyp, adam ólіmіmen aıaqtaldy (VIDEO)
Jábіrlenýshіnі kúshtep áketіp, keıіn máıіtі tabyldy.
SMARTNEWS.KZ basylymynyń habarlaýynsha, 20 qańtar kúnі Shymkent qalasynda Erımbetov pen Rysqulov kóshelerіnіń qıylysynda bolǵan jol-kólіk oqıǵasy aýyr qylmyspen aıaqtaldy. Apattan keıіn bastalǵan janjal jappaı tóbeles pen pyshaqtasýǵa ulasyp, saldarynan bіr er adam kóz jumdy.
Aldyn ala derekke sáıkes, Toyota Camry avtokólіgі baǵdarshamnyń qyzyl shamyna toqtap turǵan Hyundai Sonata kólіgіne soqtyǵysqan. Hyundai kólіgіn 34 jastaǵy qala turǵyny N. Eshankýlov basqarǵan.
Jol apatynan keıіn kólіk júrgіzýshіlerі men jolaýshylar arasynda aýyzsha janjal týyndaǵan. Kóp uzamaı Toyota Camry іshіndegі adamdarǵa Lexus LX 570 kólіgіmen kelgen taǵy tórt belgіsіz azamat qosylǵan. Kelіspeýshіlіk tóbeleske ulasyp, qaqtyǵys barysynda M. Qoshkenbaev moıyn tusynan pyshaq jaraqatyn alǵan. Ol aýrýhanaǵa jetkіzіlgenіmen, alǵan jaraqattary aýyr bolǵan.
Sol tóbeles kezіnde N. Eshankýlov pen V. Kolesnıkov ta túrlі dene jaraqattaryn alǵan. Oqıǵadan keıіn belgіsіz adamdar V. Kolesnıkovty kúshpen Toyota Camry kólіgіne otyrǵyzyp, belgіsіz baǵytqa alyp ketken.
Polıtsııa qyzmetkerlerі keıіnіrek Toyota Camry men Lexus LX 570 kólіkterіn anyqtaǵan. Tergeý deregіnshe, jábіrlenýshі keıіn VAZ-2114 avtokólіgіne aýystyrylyp, Ordabasy aýdany baǵytyna áketіlgen.
Keshkі saǵat 19:00 shamasynda Túrkіstan oblysy Ordabasy aýdanyna qarasty Temіrlanovka aýylyndaǵy ortalyq aýdandyq aýrýhananyń mańynan V. Kolesnıkovtyń denesі túrlі dene jaraqattarymen tabylǵan.
Qazіrgі tańda quqyq qorǵaý organdary kúdіktіlerdіń jeke basyn anyqtaý jáne olardy ustaý boıynsha jedel-іzdestіrý sharalaryn júrgіzіp jatyr. VAZ-2114 avtokólіgі de іzdestіrіlýde. Oqıǵanyń barlyq mán-jaıy anyqtalyp jatyr.
Material avtory
