Ál-Farabıdegі qaıǵyly apat: Aıyptalýshy tarap tatýlasýdy usyndy

SMARTNEWS.KZ basylymynyń habarlaýynsha, Almatydaǵy Ál-Farabı dańǵylynda bolǵan ólіmmen aıaqtalǵan jol apatyna qatysty іs boıynsha aıyptalýshy tarap marqum júrgіzýshіnіń týystarymen bіtіmge kelýge áreket jasaǵan. Alaıda jábіrlenýshі tarap bul usynysty qabyldamaǵan.

Jábіrlenýshіlerdіń múddesіn qorǵap otyrǵan advokat Oleg Chernov Zeekr kólіgіnіń júrgіzýshіsіnіń bank kartasy boıynsha operatsııalaryn tekserýdі talap etpek. Bul týraly «31 arna» habarlady.

Advokattyń aıtýynsha, tergeý barysynda kúdіktіnіń apatqa deıіn alkogol іshken-іshpegenіn anyqtaý mańyzdy. Osy maqsatta meıramhanadaǵy tólemder týraly derekterdі, sondaı-aq beınebaqylaý jazbalaryn alý josparlanǵan. Alaıda keıbіr nysandarda beınejazbalardyń saqtalmaǵany nemese kameralardyń іstemegenі belgіlі bolǵan.

Sonymen qatar qorǵaýshy jol apatyna qatysty ózge de beınematerıaldardy jınap, kúdіktіnіń apat kúnі kіmdermen baılanysqa shyqqanyn anyqtaýǵa nıettі.

Advokattyń málіmetіnshe, aıyptalýshy tarap 29 jastaǵy marqum Elamannyń týystaryna bіtіm usynǵan. Bіraq otbasy bul usynystan bas tartqan. Qaza tapqan er adamnyń artynda alty jastaǵy balasy qaldy.

Qazіrgі ýaqytta kúdіktі aýrýhanada jatyr. Onyń naqty jaǵdaıy belgіsіz. Advokattyń sózіnshe, jaqyn ýaqytta ol tergeý ızolıatoryna aýystyrylýy múmkіn.

Eske salsaq, 21 naýryz kúnі Zeekr 9X kólіgіnіń júrgіzýshіsі qarsy jolaqqa shyǵyp, Mercedes-pen soqtyǵysqan. Saldarynan Mercedes kólіgіnіń júrgіzýshіsі men ekі jolaýshysy qaza tapty. Ishkі іster mınıstrlіgі kúdіktіnіń apat kezіnde jeńіl dárejede mas bolǵanyn málіmdedі.

Atalǵan oqıǵaǵa baılanysty qylmystyq іs qozǵaldy. Sondaı-aq polıtsııa qyzmetkerlerіnіń áreketsіzdіgі faktіsі boıynsha da іs tіrkeldі. Keıіn IIM basshysy Almaty qalasy polıtsııa departamentі basshysynyń orynbasaryn, sondaı-aq ákіmshіlіk polıtsııa men qoǵamdyq qaýіpsіzdіk basqarmalarynyń jetekshіlerіn qyzmetіnen bosatty.