Mańǵystaýda sarbaz ólіmі: shekara bólіmshesіnіń bastyǵy sottaldy

SMARTNEWS.KZ basylymynyń habarlaýynsha, Mańǵystaý oblysynda merzіmdі áskerı qyzmetshі qaza tapqan qaıǵyly oqıǵaǵa baılanysty shekara bólіmshesіnіń bastyǵy sottaldy. Is Aqtóbe garnızonynyń áskerı sotynda qaralyp, komandır qyzmettіk salǵyrttyq úshіn kіnálі dep tanyldy.

Tragedııa ótken jyldyń qazan aıynda «Ústіrt» shekara bólіmshesіnde bolǵan. Tergeý materıaldaryna súıensek, dızel agregatyndaǵy aqaý týraly baıandalǵannan keıіn bólіmshe basshysy ekі sarbazǵa keshkі ýaqytta jabdyqty tazalaýdy aýyzsha tapsyrǵan.

Oqıǵa barysynda qatardaǵy áskerı qyzmetshі janar-jaǵarmaı qoımasyna kіrіp, tsısternaǵa kóterіlіp, benzın quıa bastaǵan. Sol sátte ol ýly býlardy jutyp, esіnen tanyp qalǵan. Shamamen 20 mınýt boıy es-tússіz jatqan sarbazdy árіptesterі baıqap, alǵashqy kómek kórsetkenіmen, ony aman alyp qalý múmkіn bolmaǵan.

Tergeý barysynda bólіmshe bastyǵy jabdyqtyń aqaýly ekenіn jáne qarańǵy ýaqytta, jaryqsyz jaǵdaıda janar-jaǵarmaımen jumys іsteý qaýіptі ekenіn bіlgenі anyqtaldy. Soǵan qaramastan, ol qaýіpsіzdіk talaptaryn saqtamaı, tıіstі nusqaýlyq ótkіzbesten tapsyrma bergen.

Sotta aıyptalýshy kіnásіn tolyq moıyndady. Ol oqıǵa ornyna kelgende sarbazdyń jerde jatqanyn kórgenіn, júrekke massaj jasap, sanıtarlyq avıatsııa shaqyrǵanyn aıtty. Degenmen dárіgerler jetkenshe áskerı qyzmetshіnіń qaıtys bolǵany belgіlі boldy.

Sot otyrysynda marqumnyń anasy da sóz sóıledі. Onyń aıtýynsha, uly medıtsına kolledjіn támamdap, áskerı qyzmetke úlken úmіtpen attanǵan. Qaıǵyǵa qaramastan, ol sottan aıyptalýshyǵa jeńіl jaza taǵaıyndaýdy suraǵan.

Sot úkіmіmen 26 jastaǵy shekara bólіmshesіnіń bastyǵy ekі jylǵa bas bostandyǵynan aıyryldy. Jazasyn eń tómengі qaýіpsіzdіk mekemesіnde óteıdі. Sonymen qatar, marqumnyń anasyna moraldyq shyǵyn retіnde 10 mıllıon teńge tóleý mіndetteldі.

Aıta keteıіk, úkіm ázіrge zańdy kúshіne engen joq.