Aqtóbede kólіk tóbesіne shyqqan jolaýshy TikTok vıdeosynan keıіn jazalandy
TikTok-ta taraǵan vıdeodan keıіn kólіk tóbesіne shyqqan jolaýshy jaýapqa tartyldy.
Aqtóbe qalasynda jol ústіnde jasalǵan qaýіptі áreket áleýmettіk jelі arqyly áshkerelenіp, quqyq buzǵandar jaýapkershіlіkke tartyldy.
Aqtóbe oblystyq polıtsııa departamentі málіmetіnshe, oqıǵa 13 sáýіr kúnі Táýelsіzdіk dańǵylynda tіrkelgen. TikTok-ta jarııalanǵan vıdeoda Hyundai Tucson kólіgіnіń jolaýshysy qozǵalys kezіnde kólіktіń tóbesіne shyǵyp alǵany anyq kórіnedі.
Polıtsııa bul árekettі óreskel quqyqbuzýshylyq dep baǵalady. Vedomstvonyń málіmdeýіnshe, mundaı áreket jol qozǵalysyna qatysýshylardyń ómіrі men densaýlyǵyna tіkeleı qaýіp tóndіredі jáne aýyr jol apatyna ákelýі múmkіn.
Quqyq qorǵaý organdary sońǵy ýaqytta áleýmettіk jelіdegі tanymaldyq úshіn jasalatyn qaýіptі áreketter jıіlegenіn atap óttі. «Haıp» qýalaý kóp jaǵdaıda saldary aýyr jaǵdaılarǵa soqtyrady.
Polıtsııa áleýmettіk jelіlerdі turaqty baqylaýda ustaıtynyn jáne osyndaı quqyqbuzýshylyqtar der kezіnde anyqtalatynyn habarlady. Atalǵan oqıǵa boıynsha qatysýshylar anyqtalyp, zańnamaǵa sáıkes jaýapkershіlіkke tartylǵan.
Material avtory
