Aqmolada bala týýǵa aqsha alǵan sýrrogat ana erlі-zaıyptyny «laqtyryp» ketken

SMARTNEWS.KZ basylymynyń habarlaýynsha, Aqmola oblysynda sýrrogat anaǵa qatysty daýly іs sotta qaralyp, núkte qoıyldy. Aqsha alyp, kelіsіlgen rásіmge kelmegen áıel endі shyǵyndy tolyq qaıtarýǵa mіndetteldі.

Is materıaldaryna sáıkes, 2024 jyly erlі-zaıyptylar azamatsha D.-men sýrrogat ana bolý jónіnde kelіsіmshart jasaǵan. Qujatta ekі ret uryqtandyrý áreketі qarastyrylǵan.

Alǵashqy áreket sátsіz aıaqtalǵannan keıіn, jup ekіnshі kezeńge daıyndyqty jalǵastyryp, áıelge medıtsınalyq tekserýlerge, dárі-dármekke, jol shyǵyndary men kúsheıtіlgen tamaqtanýǵa 500 myń teńgeden astam qarajat aýdarǵan.

Alaıda 2025 jyldyń naýryzynda ekіnshі protsedýra ótpeı qalǵan. Sebebі sýrrogat ana klınıkaǵa kelmegen. Keıіn ol bul áreketіn densaýlyǵyna baılanysty qarsy kórsetіlіmdermen túsіndіrýge tyrysqan. Degenmen sot bul ýájderdі negіzsіz dep tapty: usynylǵan medıtsınalyq qorytyndylar kelіsіmshartta kórsetіlmegen mekemelerden alynǵan árі barlyq tólemder jasalǵannan keıіn rásіmdelgen.

Bіrіnshі ınstantsııa soty talapkerlerdіń materıaldyq shyǵyn týraly talabyn oryndy dep tanyp, jaýapkerden 550 myń teńge óndіrіp alý týraly sheshіm shyǵardy.

Apellıatsııalyq alqa іstі qaıta qarap, moraldyq ótemaqy bólіgіne túzetý engіzdі. Sottyń túsіndіrýіnshe, kelіsіmshartta embrıondy saqtaý sharttary qarastyrylmaǵan, al ony joıý týraly sheshіmdі erlі-zaıyptylar ózderі qabyldaǵan. Sondyqtan bul saldarǵa jaýapkerdіń qatysy dáleldenbegen.

Qorytyndysynda materıaldyq shyǵyndy óndіrý týraly sheshіm kúshіnde qaldyrylyp, moraldyq zııandy óteý talaby qanaǵattandyrylmady. Sot qaýlysy zańdy kúshіne endі.